თბილისში „ალილო“ გაიმართა

წელს, წინა წლებისგან განსხვავებით, მსვლელობა არ გაჩერებულა პარლამენტის შენობასთან, თბილისის საკრებულოსთან და პრეზიდენტის რეზიდენციასთან. პარლამენტის სახელით ტკბილეული რესპუბლიკის მოედანზე მიიტანა სადავო პარლამენტის თავმჯდომარემ, შალვა პაპუაშვილმაც.

საშობაო მსვლელობა გაიმართა რეგიონებშიც: ბათუმში, ქუთაისში, გორსა და სხვა ქალაქებში.

ამ დღეს გროვდება ტკბილეული, ტანსაცმელი, სათამაშოები და სხვა ნივთები, რომლებსაც გადაანაწილებენ ბავშვთა სახლებში, მოხუცთა თავშესაფრებსა და სასჯელაღსრულების დაწესებულებებში.

7 იანვარს საქართველოს მართლმადიდებელი ეკლესია შობას აღნიშნავს. „ალილო“ შობის ერთ-ერთი ტრადიციაა, რომელიც ბოლო წლებია ეწყობა. პანდემიის დროს ალილოს მონაწილეების რიცხვი შეზღუდული იყო და ისინი ფეხით მსვლელობის ნაცვლად, თბილისის ქუჩებში ავტომობილებით გადაადგილდებოდნენ.