თბილისში გამართულ მრავალათასიან აქციაზე პრეზიდენტი ზურაბიშვილი „წინააღმდეგობის პლატფორმის“ შექმნისკენ მოუწოდებს

1 day ago 3

31 მარტს, საქართველოს 1991 წლის დამოუკიდებლობის რეფერენდუმის წლისთავზე, ათასობით დემონსტრანტი შეიკრიბა რუსთაველის გამზირზე მასობრივ საპროტესტო აქციაზე ლოზუნგით „სახალხო გაზაფხული მოდის“. აქციაზე სიტყვით გამოვიდა პრეზიდენტი სალომე ზურაბიშვილი, რომელმაც განაცხადა, რომ წინააღმდეგობას მიმდინარე საპროტესტო აქციებთან ერთად „პოლიტიკური ფორმატი უნდა მიეცეს“. იგი „წინააღმდეგობის პლატფორმის“ შექმნის ინიციატივით გამოვიდა პროევროპული პოლიტიკური სპექტრის მონაწილეობით, რათა მათ ერთობლივად მიაღწიონ ორ მთავარ მიზანს – „ახალი, სამართლიანი არჩევნების ჩატარებას“ და „ყველა პოლიტპატიმრის გათავისუფლებას“.

აქციას სიმბოლური დატვირთვა ჰქონდა ქართველების მიერ ქვეყნის დამოუკიდებლობის აღდგენის რეფერენდუმის 34 წლისთავთან დაკავშირებით. ზურაბიშვილმა 1991 წლის 31 მარტის რეფერენდუმზე ისაუბრა, სადაც მონაწილეთა 99%-მა მხარი დაუჭირა საბჭოთა კავშირისგან ქვეყნის დამოუკიდებლობას. მან დამოუკიდებლობისკენ მიმავალი გრძელი გზა გაიხსენა და ყურადღება გაამახვილა 1924 წლის აგვისტოს აჯანყებაზე, 1978 წლის 14 აპრილის საპროტესტო აქციებზე ქართული ენის დასაცავად და 1989 წლის 9 აპრილის ტრაგედიაზე, როდესაც საბჭოთა ძალების მიერ თბილისში მშვიდობიანი დემონსტრანტების სასტიკ დარბევას ადამიანების მსხვერპლი მოყვა. არსებულ პოლიტიკურ ვითარებასთან პარალელების გავლებისას, მან ქართველი მომიტინგეები გამძლეობისთვის, დემოკრატიისა და დამოუკიდებლობისთვის მიმდინარე ბრძოლისთვის შეაქო.

„დღეს ეს მშვიდობიანი ჯარი დგას რუსთაველზე და ჩვენი ქალაქების ქუჩებში. დგას და წინააღმდეგობას უწევს უსამართლობას, ძალადობას, დამონებას, დაპყრობას“, – მიმართა მან აქციის მონაწილეებს.

ზურაბიშვილის მიმართვა დეტალურად

შემოთავაზებული წინააღმდეგობის პლატფორმა

სალომე ზურაბიშვილმა განაცხადა, რომ იგი რჩება ფიცის ერთგული – „ვემსახურო ქვეყანას, დავიცვა კონსტიტუცია და ქართველი ხალხის ნება და ინტერესი“ და რჩება საქართველოს ლეგიტიმურ პრეზიდენტად ახალი თავისუფალი და სამართლიანი არჩევნების ჩატარებამდე. ამ კუთხით მან ხაზგასმით აღნიშნა, რომ საპროტესტო მოძრაობას სტრატეგიის გაფართოება სჭირდება.

„მიზნის მისაღწევად საჭიროა, ამ ბრძოლას ქუჩის პროტესტთან ერთად და მასთან შეჯერებით, მიეცეს პოლიტიკური ფორმატიც“, – განაცხადა ზურაბიშვილმა. „ამიტომ შევთავაზე და დღეს თქვენს წინაშე საჯაროდ ვაცხადებ, რომ შეიქმნას პროევროპული პოლიტიკური სპექტრის მონაწილეობით – „წინააღმდეგობის პლატფორმა“.“

მისი თქმით, ამ პლატფორმის მთავარი პრინციპი ის არის, რომ „იგი ღიაა ყველა პროევროპული პარტიისა და ჯგუფისთვის, რომლებიც მზად არიან გვერდზე გადადონ პოლიტიკური შეუთავსებლობები და ბოლომდე გაიზიარონ პროტესტის ორივე მთავარი მიზანი: დაინიშნოს ახალი და თავისუფალი არჩევნები და გათავისუფლდნენ სინდისის პატიმრები“.

ზურაბიშვილმა განმარტა, რომ ამ მიზნების მისაღწევად წინააღმდეგობის პლატფორმა თანხმდება, რომ შეაჯეროს პოლიტიკური პოზიციები, რათა „კოორდინირებულად, ანუ უფრო ეფექტურად, ამხილოს და დაუპირისპირდეს რეჟიმს და მის ქმედებებს. წინააღმდეგობა გაუწიოს და წინ აღუდგეს რეჟიმის მცდელობას გაანადგუროს საქართველოს განვითარების ყველა პერსპექტივა და მისი ევროპული მომავალი“.

„ამის შესახებ საზოგადოება სრულად და მყისიერად იქნება ინფორმირებული და მჭიდრო კომუნიკაცია დამყარდება სამოქალაქო საზოგადოებასთან და პროტესტის მონაწილე ჯგუფებთან, რათა ერთობლივი სტრატეგია მიღწეული იყოს“, – განაცხადა მან.

ზურაბიშვილმა ასევე აღნიშნა, რომ „ჩვენი პასუხისმგებლობაა დროულად მოვემზადოთ და საზოგადოებასთან და სამოქალაქო სექტორთან ერთად დაუყონებლივ შევუდგეთ, დამკვირვებლების მასობრივ გადამზადებას, რათა ერთიანად და ეფექტურად დავიცვათ წინააღმდეგობის ხმები“.

მან ასევე ხაზგასმით აღნიშნა, რომ მის მიერ ინიცირებული „ქართული ქარტია“ უნდა იყოს მომავალი პროგრამა პლატფორმისთვის საქართველოს დემოკრატიულ გზაზე დასაბრუნებლად.

„ქართული ოცნების“ მმართველობის სამი საყრდენის ჩამოშლა

ზურაბიშვილმა აქციის მონაწილეებს უთხრა, რომ მმართველი პარტიის რეპრესიები და სისასტიკე მათ მიმართ მისი პოლიტიკური წარუმატებლობის ნიშანია.

„ვერ გააჩერეს პროტესტი, ვერ გააჩუმეს ხალხი, ვერ ჩაახშეს, ვერ დააშინეს, ვერ დააქუცმაცეს. ამდენი ფული, უამრავი ბერკეტი და უზომო ძალა ერთ ხელშია, მაგრამ შედეგი არაა!” – განაცხადა მან. „მიუხედავად მთელი ფულის, გაუთავებელი რესურსებისა და მათ ხელში კონცენტრირებული უზარმაზარი ძალაუფლებისა, მათ არანაირი შედეგი არ აქვთ!“

ზურაბიშვილის თქმით, „ქართული ოცნების“ მმართველობა სამ ძირითად საყრდენზე დგას: ოლიგარქის გარემოცვის ფინანსურ ინტერესებზე, რუსულ პროპაგანდასა და პროპაგანდისტებზე, რომლებიც ცდილობენ ხალხის მოტყუებას და დამორჩილებას და რუსულ ძალადობრივ სისტემაზე.

ზურაბიშვილმა განაცხადა, რომ „ამ საყრდენების დასუსტება და ჩამოშლა“ გადამწყვეტია საქართველოს დემოკრატიულ გზაზე დასაბრუნებლად.

„ეს არის არა ძალადობრივი ბრძოლის რთული, ალბათ, გრძელი, მაგრამ საბოლოოდ წარმატებული გზა, რომელიც საქართველოს სამშვიდობოს გაიყვანს“, – დასძინა მან.

„ქართული ოცნების“ პარლამენტის საგამოძიებო კომისიის დაგმობა

ზურაბიშვილმა „ქართული ოცნების“ პარლამენტში შექმნილი დროებითი საგამოძიებო კომისია გააკრიტიკა, რომელიც „ნაციონალური მოძრაობის“ ყოფილი ხელისუფლების სავარაუდო დანაშაულებს იძიებს და რომელსაც იუსტიციის ყოფილი მინისტრი თეა წულუკიანი ხელმძღვანელობს.

„არ შემიძლია, მე დღეს, 31 მარტს, ვიდგე აქ, თქვენს წინაშე, როგორც მთავარსარდალი და არ აღვუდგე იმ საზიზღრობას, რომლითაც ცდილობენ ჩვენი ყურადღება გადაიტანონ და სანახაობად აქციონ“, – განაცხადა ზურაბიშვილმა. „ვსაუბრობ პროკურორ თეა „ვიშინსკის“ ეგრეთ წოდებულ საინვესტიგაციო კომიტეტზე. ეს არც ისტორიის გარკვევას, არც გაგებას ემსახურება. ეს არის სადამსჯელო წარმონაქმნი, რომელიც ემსახურება შურისძიებას“.

„იმის შემდეგ, რაც ამ რეჟიმმა ყველა დამოუკიდებელი დაიმორჩილა, მას შემდეგ, რაც საქართველოს სასამართლო სისტემა გააუქმა, მოახდინა პოლიციის დისკრედიტაცია და მას ჩამოართვა მთავარი მისი ფუნქცია – ანუ მოქალაქეების დაცვა, ამ ბოლო ნაბიჯით კი ქართული ჯარის ნგრევას ემსახურება“, – განაცხადა მან და დასძინა, რომ ეს წარმოადგენს „ანტი-სახელმწიოფოებრივ ქმედებას“.

მან ასევე განაცხადა, რომ „ეს სამარცხვინო სანახაობა, რომელსაც პირდაპირ ეთერში გვაყურებინებენ, ემსახურება ჯარის სრულ დისკრედიტაციის მცდელობით საზოგადოების დემორალიზაციას“. შემდეგ მან, სავარაუდოდ, ბიძინა ივანიშვილზე მინიშნებით აღნიშნა: „მმართველი, რომელიც ამას მოიფიქრებს და ამას უკეთებს საკუთარ ქვეყანას, ჯარსა და ხალხს, არის მტერი ჩვენი სახელწიფოებრიობის, მაშასადამე ჩვენი დამოუკიდებლობისა და ჩვენი მომავლის… ცალკეული მოქალაქის მტერი!“

სანამ სალომე ზურაბიშვილი კომისიის შესახებ საუბრობდა, რომელიც ამჟამად 2008 წლის აგვისტოს ომს იძიებს და გამოკითხვაზე ქართველ გენერლებს იბარებს, აქციის რამდენიმე მონაწილემ მას შესძახა, რომ ეპასუხა, ვინ დაიწყო ომი.

საპროტესტო აქციების საერთაშორისო მხარდაჭერა

პრეზიდენტმა ხაზი გაუსვა საპროტესტო აქციების საერთაშორისო მხარდაჭერას და აღნიშნა, რომ საქართველოში სადავო არჩევნებიდან ხუთი თვის შემდეგ „არც ერთი დემოკრატიული ქვეყანა არ აღიარებს გაყალბებულ არჩევნებს და ხელისუფლების ლეგიტიმურობას“.

ზურაბიშვილმა აღნიშნა, რომ მისი ბოლო ვიზიტის დროს ბალტიის ქვეყნების ლიდერებმა მას სთხოვეს გადაეცა ხალხისთვის მათი სოლიდარობა და თანადგომა.

„როცა ჩვენი პარტნიორები, მაღალ დონის შეხვედრებზე, თან პარლამენტების წინაშე მიწვევენ – მე და არა მმართველ პარტიას- ეს თქვენი მხარდაჭერის ნიშანია, თქვენი ბრძოლის აღიარებაა“, – აღნიშნა მან.

მან ასევე მოუწოდა აქციის მონაწილეებს გააგრძელონ ბრძოლა და არ აყვნენ ნიჰილიზმს. „ცრუ მოლოდინებს არ გაჰყვეთ“, – მიმართა ზურაბიშვილმა აქციის მონაწილეებს. „მათაც ეს უნდათ! უნდათ, რომ ერთმანეთს დაგვაპირისპირონ, დაწყებული კამპანიები ამას ემსახურება“.

„ნამდვილად ვიცი ჩვენი ბრძოლა გაგრძელდება მანამ, სანამ არ გავიმარჯვებთ! ბრძოლა იქნება ბოლომდე!“ – დასძინა მან.

ასევე წაიკითხეთ: