თეატრისა და კინოს უნივერსიტეტის რექტორმა აქციის მონაწილე სტუდენტებისთვის სტატუსის შეწყვეტის გადაწყვეტილება გააუქმა

შოთა რუსთაველის თეატრისა და კინოს სახელმწიფო უნივერსიტეტის რექტორმა გიორგი შალუტაშვილმა 13 მარტს გააუქმა გადაწყვეტილება სტუდენტური სტატუსის შეწყვეტის შესახებ იმ 10 მომიტინგეისთვის, რომლებიც უნივერსიტეტის შენობაში თვეების განმავლობაში „ქართული ოცნების“ მიერ ევროპული კურსის ცვლილებას აპროტესტებდნენ და ყველა დაკავებულ აქციის მონაწილეს სოლიდარობას უცხადებდნენ.

„სტუდენტების, პედაგოგებისა და თანამშრომლების განცხადებების საფუძველზე, უნივერსიტეტის საუკეთესო ინტერესებიდან გამომდინარე, რექტორმა მიიღო გადაწყვეტილება  არ გამოიყენოს  სტუდენტების მიმართ დისციპლინური პასუხისმგებლობის უკიდურესი ზომა –   სტატუსის შეწყვეტა“, – დაწერა უნივერსიტეტმა სოციალურ ქსელში.

გადაწყვეტილებას წინ უძღოდა საზოგადოების კრიტიკა სტუდენტური პროტესტის მიმართ უნივერსიტეტის დამოკიდებულების გამო. უნივერსიტეტმა 10 მარტს აქციის მონაწილე რამდენიმე სტუდენტს სტუდენტური სტატუსი შეუჩერა მას შემდეგ, რაც წინა დღეს უნივერსიტეტის შენობაში გამართული აქციის გამო ისინი 5 000 ლარით დაჯარიმდნენ.

შალუტაშვილი 12 მარტს საზოგადოებრივი მაუწყებლის პირდაპირ ეთერში გამოჩნდა. თუმცა, აქციის მონაწილე სტუდენტებმა ის ტყუილების თქმაში დაადანაშაულეს და სტუდენტთა წარმომადგენლისთვის საეთერო დროის მიცემა მოითხოვეს. „საეთერო დრო სტუდენტებს, სოლიდარობა სტუდენტებს”, სკანდირებდნენ აქციის მონაწილეები მაუწყებლის შენობის წინ.

იმავე დღეს რექტორი, მაუწყებლის წარმომადგენლები და სტუდენტები შეიკრიბნენ არსებული ვითარების განსახილველად. მხარეები შეთანხმდნენ, რომ 14 მარტს, 22:00 საათზე პირდაპირ ეთერში შეხვდებოდნენ ერთმანეთს, რა დროსაც შალუტაშვილი და რამდენიმე სტუდენტი განვითარებულ მოვლენებთან დაკავშირებით თავიანთ პოზიციებს წარმოადგენდნენ.

სტუდენტებს, რომლებიც 17 დეკემბრიდან თეატრალურ უნივერსიტეტში საპროტესტო აქციას მართავდნენ, 9 მარტს უთხრეს, რომ უნივერსიტეტის ფოიე დაეტოვებინათ მას შემდეგ, რაც დასუფთავების სამსახურმა დილიდან გაუფრთხილებლად დეზინფექციის ჩატარება დაიწყო. სტუდენტების თქმით, უნივერსიტეტის ადმინისტრაციამ მათ უთხრა, რომ პროტესტი სულ რაღაც ხუთ კვადრატულ მეტრ სივრცეში გაეგრძელებინათ, რაზეც მათ უარი განაცხადეს. უნივერსიტეტის ადმინისტრაციამ მაშინვე პოლიცია გამოიძახა, რომელმაც ჯერ გააფრთხილა სტუდენტები უნივერსიტეტის ფოიეს დატოვების შესახებ, თუმცა მალევე დაბრუნდა და ადგილზე დარჩენილი სტუდენტები თითოეული 5 000 ლარით დააჯარიმა.

სტუდენტების სტატუსის შეჩერების თაობაზე გადაწყვეტილებას აქციის მონაწილეთა მხრიდან სოლიდარობის მოწოდება მოყვა და აკადემიურ პერსონალს შორის შიდა უთანხმოებაც გამოიწვია. 13 მარტს პროფესორმა თამარ ცაგარეელმა თანამდებობა დატოვა უნივერსიტეტის აკადემიურ საბჭოში და უნივერსიტეტის ეთიკის კომისია სტუდენტების „გაწირვისთვის“ გააკრიტიკა. „ჩემთვის, ძალიან რთულია ვიყო იმ საბჭოს წევრი, რომელშიც, ახალგაზრდების “მოძულე” აკადემიური პერსონალია“, – დაწერა მან ფეისბუქზე.

This post is also available in: English (ინგლისური)