ინტენსიური შეტაკებებია უკრაინის აღმოსავლეთში, რუსეთი პოკროვსკისკენ მიიწევს

უკრაინის აღმოსავლეთის ფრონტიდან იუწყებიან შეტაკებებზე, რუსეთის ძალები კვლავ წინ მიიწევენ - კრემლის სტრატეგიის შესახებ მსჯელობის ფონზე.

უკრაინის შეიარაღებული ძალების გენერალურმა შტაბმა 24 დეკემბერს გამოაცხადა, რომ წინა დღიდან შუადღემდე აღირიცხა 235 შეტაკება, ინტენსიური ბრძოლაა ხარკოვის, დონეცკისა და კუპიანსკის მიმართულებებით.

ამავე განცხადებით, რუსეთმა ამ პერიოდში დაკარგა 1600-ზე მეტი ჯარისკაცი და 30 დაჯავშნული მანქანა - ამ მონაცემის დამოუკიდებლად გადამოწმება არ ხერხდება. მოსკოვი იშვიათად აკეთებს განცხადებებს ომში მისი დანაკარგების თაობაზე.

ომის შემსწავლელმა ინსტიტუტი (ISW) 23 დეკემბერს გავრცელებულ ანგარიშში წერს, რომ მიმდინარე ბრძოლაში რუსეთის პრიორიტეტები ბუნდოვანი რჩება - რადგან სამხედროები წინსვლას აღწევენ სამხრეთით და სამხრეთ-დასავლეთით დონეცკის რეგიონში მდებარე ქალაქ პოკროვსკიდან.

"გაურკვეველია რამდენად შეძლებენ რუსეთის ძალები ამ წინსვლის გამოყენებას ქალაქის გარშემორტყმისთვის, თუ ისინი აპირებენ დონეცკის რეგიონის ადმინისტრაციული საზღვრისკენ წაიწიონ წინ" - წერს ISW.

რუსეთის პრეზიდენტმა, ვლადიმირ პუტინმა გასულ კვირაში განაცხადა, რომ მოსკოვი უახლოვდება ომში თავისი მთავარი მიზნის მიღწევას, თუმცა დეტალები არ დაუკონკრეტებია.

უკრაინის ძალების კონტრშეტევის შემდეგ, რომლის მიზანიც იყო იქ შეჭრილი რუსეთის ძალების განდევნა და რომელმაც მცირე წარმატება მოიტანა 2023 წლის ოქტომბრისთვის, რუსეთის ძალები ნელ-ნელა მიიწევენ წინ დასავლეთით. რუსეთი ამჟამად დონეცკის რეგიონის ტერიტორიის 60 პროცენტამდე არეალს აკონტროლებს.

ახლა შესაძლოა რუსეთის ძალები ახლოს იყვნენ ქალაქ პოკროვსკის დაკავებასთან - რომელიც მნიშვნელოვანი ლოგისტიკური ცენტრია ამჟამინდელი ფრონტის ხაზისთვის.

პოკროვსკი სტრატეგიულადაა მნიშვნელოვანი, რადგან წარმოადგენს ტრანსპორტაციის მნიშვნელოვან ცენტრს, ახლოსაა ფრონტის ხასთან და მოქმედებს როგორც მომარაგების ცენტრი დონბასის რეგიონში მიმდინარე სამხედრო ოპერაციებისთვის.