ირაკლი კობახიძე თურქმენეთს სტუმრობს

ცენტრალური აზიის ქვეყნებში ვიზიტების სერიის ფარგლებში, „ქართული ოცნების“ პრემიერ-მინისტრი ირაკლი კობახიძე 6 მარტს ოფიციალური ვიზიტით თურქმენეთში ჩავიდა. 7 მარტს იგი თურქმენეთის პრეზიდენტს სერდარ ბერდიმუჰამედოვს შეხვდა.

„ქართული ოცნების“ მთავრობის ადმინისტრაციის პრესრელიზის თანახმად, ოფიციალური ვიზიტის ფარგლებში, საქართველოს პირველი ვიცე-პრემიერისა და თურქმენეთის მინისტრთა კაბინეტის თავმჯდომარის მოადგილის ხელმძღვანელობით, საქართველოსა და თურქმენეთის მთავრობის წევრების გაფართოებული ფორმატის მოლაპარაკებები გაიმართება, რომლის შემდეგ დარგობრივ უწყებებს შორის სხვადასხვა სფეროში თანამშრომლობის შესახებ შეთანხმებები გაფორმდება.

საქართველოს დელეგაციის შემადგენლობაში ასევე არიან პირველი ვიცე-პრემიერი, ეკონომიკისა და მდგრადი განვითარების მინისტრი ლევან დავითაშვილი, საგარეო საქმეთა მინისტრი მაკა ბოჭორიშვილი, რეგიონული განვითარებისა და ინფრასტრუქტურის მინისტრი ირაკლი ქარსელაძე, გარემოს დაცვისა და სოფლის მეურნეობის მინისტრი დავით სონღულაშვილი, სპორტის მინისტრი შალვა გოგოლაძე და მთავრობის ადმინისტრაციის უფროსი ლევან ჟორჟოლიანი.

შეხვედრა თურქმენეთის პრეზიდენტ სერდარ ბერდიმუჰამედოვთან

7 მარტს გამართული შეხვედრის დროს ირაკლი კობახიძემ და სერდარ ბერდიმუჰამედოვმა ორ ქვეყანას შორის არსებულ მეგობრული ურთიერთობები და სხვადასხვა სფეროში თანამშრომლობა განიხილეს. აღინიშნა ორმხრივი პოლიტიკური და ეკონომიკური კავშირების განვითარების დადებითი დინამიკა.

„ქართული ოცნების“ მთავრობის ადმინისტრაციის ინფორმაციით, მხარეებმა ყურადღება დაუთმეს დაკავშირებადობისა და შუა დერეფნის განვითარების მნიშვნელობას. ირაკლი კობახიძემ ისაუბრა იმ სატრანსპორტო-ლოჯისტიკურ პროექტებზე, რომლებიც საქართველოს სატრანზიტო  ფუნქციის კიდევ უფრო გაძლიერებას ისახავს მიზნად.

ირაკლი კობახიძემ აღნიშნა, რომ საქართველო მიესალმება თურქმენეთის აქტიურ ძალისხმევას, რომელიც მიმართულია ცენტრალურ აზიაში მშვიდობის უზრუნველყოფისკენ და საქართველოს ხელისუფლების სამშვიდობო პოლიტიკაზე ისაუბრა.

„თურქმენეთთან მჭიდრო კავშირების გაღრმავება უსაფრთხო და დაცული შუა დერეფნის განვითარების მიზნით ჩვენი დღის წესრიგის მთავარი საკითხია. მიმაჩნია, რომ ჩვენს პარტნიორობას აქვს პოტენციალი, უზრუნველყოს მეტი მშვიდობა და ეკონომიკური განვითარება რეგიონში და მის ფარგლებს გარეთ“, – დაწერა კობახიძემ შეხვედრის შემდეგ სოციალურ ქსელში.

მასალა განახლდება…

ასევე წაიკითხეთ:

• 17/08/2022 – საგარეო საქმეთა მინისტრის მოადგილემ თურქმენეთში გამართულ მინისტერიალში მიიღო მონაწილეობა
• 20/07/2022 – საქართველოს პრემიერმინისტრი თურქმენეთს სტუმრობს

This post is also available in: English (ინგლისური)