ირაკლი რუხაძემ დიდი ბრიტანეთის უზენაეს სასამართლოში დავა წააგო

სახელისუფლებო ტელეკომპანია „იმედის“ მფლობელმა ირაკლი რუხაძემ დიდი ბრიტანეთის უზენაეს სასამართლოში დავა წააგო და კომპენსაციის სახით 170 მილიონ დოლარზე მეტის გადახდა დაეკისრა.

სასამართლომ ძალაში დატოვა სააპელაციო სასამართლოს 2023 და 2022 წლების განაჩენები, რომლითაც ბიზნესმენ ირაკლი რუხაძეს და მის ბიზნესპარტნიორებს ბენჯამინ მარსონსა და იგორ ალექსეევს კომპანიების Revoker-ისა და Recovery Partners-ის მიმართ მრავალმილიონიანი კომპენსაციის გადახდა დაეკისრათ.

გადაწყვეტილება არსებითად გარდაცვლილი ქართველი მილიარდერი ბიზნესმენის ბადრი პატარკაციშვილის ოჯახის სასარგებლოდ არის მიღებული. საქმე 2018 წლის ნოემბერში მიღებულ განაჩენს უკავშირდება, რომლითაც ინგლისის სასამართლომ დაადგინა, რომ რუხაძემ და მისმა ბიზნესპარტნიორებმა ჩაიდინეს „კომერციული შეთქმულება”, რომლის შედეგადაც კომპანიებმა, Recovery Partners GP Limited-მა და Revoker LLP-მა “მილიარდიანი პროექტის” განხორციელების შესაძლებლობა დაკარგეს.

გაერთიანებული სამეფოს უზენაესი სასამართლოს შვიდმა მოსამართლემ ერთხმად მიიღო გადაწყვეტილება რუხაძის წინააღმდეგ და დაადასტურა, რომ მან და მისმა პარტნიორებმა მიზანმიმართულად ძირი გამოუთხარეს პატარკაციშვილის აქტივების აღდგენის პროექტს, რომელიც მათ ბიზნესმენის საინვესტიციო კომპანია Salford Capital Partners International-მა ანდო. შედეგად, პატარკაციშვილის ოჯახისთვის გამიზნული აქტივები რუხაძემ და მისმა პარტნიორებმა საკუთარი კომპანიის, Hunnewell Partners-ის მეშვეობით მიითვისეს.

განაჩენის გასაჩივრების მიუხედავად, სააპელაციო სასამართლომ გადაწყვეტილება 2019 წლის მარტში ძალაში დატოვა და 2022 წლის ივლისში 170 მილიონ დოლარზე მეტი კომპენსაციის, ასევე დარიცხული პროცენტებისა და იურიდიული ხარჯების ანაზღაურების გადაწყვეტილება გამოიტანა. საქმესთან დაკავშირებით რუხაძეს ქონების ნაწილი დაუყადაღეს.

მილიარდერის გარდაცვალების შემდეგ პატარკაციშვილის ოჯახმა ჯამში 2 მილიარდ დოლარზე მეტი ღირებულების ქონება მიიღო და ამ პროცესში ბრალდებულებმა კომპენსაციის სახით მნიშვნელოვანი ქონება დააგროვეს. მაშინ მათ კომპანია Hunnewell Partners დააარსეს აქტივების მოძიების მიზნით და მნიშვნელოვანი ფინანსური მოგებაც მიიღეს, მათ შორის ინვესტიციები მსხვილ ქართულ კომპანიებში, როგორიცაა ლიბერთი ბანკი, რუსთავის მეტალურგიული ქარხანა, მაგთიკომი და ჰაიდელბერგცემენტი.

ჰოლდინგი ასევე ფლობს Georgian Media Production Group-ს, რომელიც თავის მხრივ ფლობს ტელეკომპანია „იმედის“ და GDS-ის 100%-იან წილს. ირაკლი რუხაძე და მისი ბიზნესპარტნიორები ასევე ფლობენ 50.5%-იან წილს საქართველოს უმსხვილეს ცემენტის მწარმოებელში, Honeywell Cement-ში (ყოფილი Heidelberg Cement), სადაც ის „ქართული ოცნების“ დამფუძნებლის ბიძინა ივანიშვილის ბიზნეს პარტნიორია.

ასევე წაიკითხეთ:

• 06/03/2025 – ტელეკომპანია „იმედის“ ინფორმაცია პროტესტის გამო საჯარო მოხელის გათავისუფლების ნორმალიზებას ახდენს
• 25/12/2024 – ტელეკომპანია „იმედის“ მფლობელი „ქართულ ოცნებას“ და ირაკლი კობახიძეს აკრიტიკებს
• 15/07/2024 – პროსამთავრობო არხის მფლობელი ამბობს, რომ ევროატლანტიკური მისწრაფებები კონსტიტუციაში არ უნდა იყოს ასახული

This post is also available in: English (ინგლისური)