ირანმა ისრაელს აშშ-ის თავდასხმების შემდეგ თანამშრომლობა შეაჩერა გაეროს ბირთვულ სააგენტოსთან  

ირანმა 2 ივლისს ოფიციალურად შეაჩერა თანამშრომლობა გაეროს ბირთვული მეთვალყურეობის სააგენტოსთან (IAEA), რაც მოჰყვა ისლამური რესპუბლიკის ბირთვულ და სხვა ობიექტებზე ისრაელის და აშშ-ის უპრეცედენტო თავდასხმების სერიას.

12-დღიანი იერიშების გამო, რომლებიც 13 ივნისს დაიწყო, უკიდურესად დაიძაბა ურთიერთობა თეირანსა და ატომური ენერგეტიკის სააგენტოს შორის.

25 ივნისს, ცეცხლის შეწყვეტის მეორე დღეს, ირანის კანონმდებლების უმრავლესობამ მხარი დაუჭირა ვენაში დაფუძნებულ უწყებასთან თანამშრომლობის შეჩერებას.

სახელმწიფო მედია ადასტურებს, რომ კანონი ძალაში შევიდა.

ირანის მედიის თანახმად, რომელსაც AFP ეყრდნობა, ამ კანონის მიზანია ბირთვული იარაღის გაუვრცელებლობის ჩარჩოებში, განსაკუთრებით ურანის გამდიდრებაზე აქცენტით, “ირანის ისლამური რესპუბლიკის განუყოფელი უფლების მხარდაჭერა.“

გაეროს სააგენტოს ინსპექტორებს ირანის ბირთვულ ობიექტებზე წვდომა ჰქონდათ, ახლა მათი სტატუსი ცხადი არაა.

როგორც გაეროში ირანის ელჩმა ამირ საიდ ირავანიმ განაცხადა, ინსპექტორების მუშაობა შეჩერებულია.
ურანის გამდიდრება დიდი ხანია მთავარი სადაო საკითხია თეირანსა და ვაშინგტონს შორის მოლაპარაკებებზე, რომლებიც შეწყდა ირანზე იერიშის გამო.

ირანის ბირთვული ობიექტებზე ისრაელის და აშშ-ის თავდასხმების შემდეგ ირანმა მკაცრად გააკრიტიკა ბირთვული სააგენტო დუმილის გამო.