ისრაელი ქალაქ ღაზას საომარ ზონად აცხადებს, ჰუმანიტარული ორგანიზაციები ადგილზე რჩებიან

ისრაელმა ღაზის სექტორის უდიდესი ქალაქი, ღაზა, გამოაცხადა ომის მიმდინარეობის სახიფათო ზონად, იმ ფონზე, როცა არმიამ დაიწყო "პირველი ფაზები" დაგეგმილი შეტევისა, რომელიც მწვავე საერთაშორისო კრიტიკის საგანია.

ასევე პარასკევს, 29 აგვისტოს ისრაელის არმიამ მიაგნო კიდევ ორი ისრაელელი მძევლის გვამებს - მათ შორის კაცის, ილან ვაისის, რომელიც მოკლეს აშშ-ის და ევროკავშირის მიერ ტერორისტულ ორგანიზაციად გამოცხადებული ჰამასის მხრიდან ისრაელზე თავდასხმისას 2023 წლის 7 ოქტომბერს - რამაც ბიძგი მისცა ღაზაში მიმდინარე ომს. ვაისის და კიდევ ერთი მძევლის გვამები ისრაელში დააბრუნეს.

არმიის მხრიდან იმ განცხადების ფონზე, რომ ქალაქში განახლდება ბრძოლა, რომელმაც შესაძლოა მოსახლეობისთვის შეუძლებელი გახადოს საკვების და სხვა დახმარების მიღება, ჰუმანიტარული ორგანიზაციები და ეკლესია, რომელსაც ხალხი აფარებს თავს აცხადებენ, რომ ადგილზე რჩებიან. სააგენტო ასოშიეიტედ პრესი (AP) წერს, რომ ეს ორგანიზაციები უარს ამბობენ მიატოვონ მოშიმშილე, იძულებით გადაადგილებული ადამიანები, რომლებიც მათზე არიან დამოკიდებულნი.

ისრაელმა რამდენიმე კვირის წინ გამოაცხადა გეგმა, რომ თავისი თავდასხმის გაფართოებას აპირებდა ქალაქ ღაზაში - რომელსაც ასი ათასობით ადამიანი აფარებს თავს, შიმშილის პირობებში. ისრაელის არმიამ მას მერე გაახშირა დარტყმები ქალაქის შემოგარენში მდებარე უბნებზე.

გაერომ და ჰუმანიტარულმა ორგანიზაციებმა ისრაელის ეს ნაბიჯი დაგმეს, თუმცა ქალაქ ღაზაში ადგილობრივი ხალხი ამბობს, რომ ეს ვითარებას მნიშვნელოვნად არ ცვლის, რადგან თავდასხმები ისედაც განიცდიდა ინტენსიფიკაციას და მათთან საკმარისი დახმარება აღარ ჩადიოდა.

გაერომ 28 აგვისტოს გამოაცხადა, რომ ბოლო კვირაში განხორციელდა 23 000 ადამიანის ევაკუაცია, თუმცა, AP-ის ცნობით, ქალაქ ღაზაში მყოფი ბევრი პალესტინელი ამბობს, რომ მრავალჯერადი გადაადგილების შედეგად დაღლილია და ვერ ხედავს ქალაქის დატოვების აზრს, რადგან მგზავრობა ძვირი ღირს და უსაფრთხო თავშესაფარი აღარსადაა.