კობახიძე ბუდაპეშტში უნგრეთის რევოლუციის 70 წლის საიუბილეო ღონისძიებებს დაესწრო

„ქართული ოცნების“ პრემიერ-მინისტრი ირაკლი კობახიძე 23 ოქტომბერს ბუდაპეშტს ესტუმრა, სადაც უნგრეთის რევოლუციის 70 წლის საიუბილეო ღონისძიებებს დაესწრო.

საქართველოს მთავრობის მიერ გავრცელებულ ფოტოებში კობახიძე უნგრეთის პრემიერ-მინისტრ პიტერ მადიართან და სხვა ევროპელ ლიდერებთან და ოფიციალური პირებთან ერთად ჩანს.

მოწვეულ სტუმრებს შორის იყვნენ ევროკომისიის პრეზიდენტი ურსულა ფონ დერ ლაიენი, ევროპის საბჭოს პრეზიდენტი ანტონიო კოსტა, მოლდოვას პრეზიდენტი მაია სანდუ, უკრაინის პარლამენტის თავმჯდომარე რუსლან სტეფანჩუკი, ნატოს ყოფილი გენერალური მდივანი იენს სტოლტენბერგი და სხვადასხვა ქვეყნის ოფიციალური პირები და დელეგაციები. მედიის ინფორმაციით, მიწვევის მიუხედავად, ევროპული ქვეყნების ბევრი ლიდერი ღონისძიებებს არ დაესწრო.

საქართველოს მთავრობის პრესრელიზის თანახმად, ვიზიტის ფარგლებში კობახიძე გალა კონცერტსა და მადიარის მასპინძლობით გამართულ ოფიციალურ მიღებას დაესწრო.

ვიქტორ ორბანის პრემიერ-მინისტრობის დროს უნგრეთი ბოლო წლებში „ქართული ოცნების“ მთავრობის უახლოესი ევროპელი პარტნიორი იყო, ქვეყნის ტრადიციული დასავლელი პარტნიორებისგან იზოლაციის ფონზე.

არჩევნებში გამარჯვების შემდეგ, მადიარმა საქართველოსთან „კარგი ურთიერთობების“ გაგრძელების პირობა დადო.

This post is also available in:

Follow Us