“კრიტიკული გამოფენის შემდეგ გორის მერია გვატოვებინებს შენობას, რომელიც ნაგავსაყრელი იყო და დონორების დახმარებით აღვადგინეთ”

გორის ხელოვნების სახლის წარმომადგენლები ამბობენ, რომ კოლაბორაციულ თემაზე გამოფენის გახსნიდან 5 დღეში გორის მერიამ უზუფრუქტის ხელშეკრულების შეწყვეტის შესახებ აცნობა.

ხელოვნების სახლი არის შემოქმედებითი ორგანიზაცია, რომელიც აერთიანებს გალერეას და მერაბ მამარდაშვილის სახელობის თავისუფალ სივრცეს. ორგანიზაციის წარმომადგენლები მერიის გადაწყვეტილებას უკავშირებენ საპროტესტო თემაზე გამოფენას და სამართლებრივი დავის წამოწყებას გეგმავენ.

„ხელოვნების სახლის რეზიდენტებმა 16 ნოემბერს გავხსენით კოლაბორაციული გამოფენა, რომელიც იყო რეფლექსია მიმდინარე პროტესტებზე და აერთიანებდა დამოუკიდებელი საქართველოს ისტორიის მანძილზე პროტესტის მონაწილეების მიერ გამოყენებულ ფრაზებს. ინსტალაციის გახსნიდან ზუსტად 5 დღეში გორის მერიისგან მივიღეთ წერილი, რომელიც გვთხოვდა 2 თვის წინ განახლებული უზუფრუქტის ხელშეკრულების შეწყვეტას აბსურდული მიზეზით, თითქოს მერიას სჭირდება ხელოვნების სახლის სივრცე, რადგან „მუნიციპალიტეტს არ გააჩნია სხვა შესაბამისი ქონება”. ჩვენს საპასუხო წერილში ხელშეკრულების შეწყვეტაზე უარის მიღების შემდეგ, გორის მერიამ მორიგი აბსურდული მიზეზი დაასახელა ხელშეკრულების შეწყვეტის საფუძვლად — ელექტროენერგიის განმხოლოება. ჩვენ გვქონდა ელექტროენერგიის საკითხის მოგვარების მცდელობა, თუმცა „ენერგო პროსგან” მივიღეთ პასუხი, რომ ამ პროცესს მერიის თანხმობა სჭირდება. ასევე, ხელშეკრულებაში არ არის მითითებული ელექტროენერგიის განმხოლოების ვადა, შესაბამისად, ჩვენი მხრიდან ხელშეკრულება არ დარღვეულა“, — ნათქვამია ხელოვნების სახლის განცხადებაში.

განცხადებაში ხაზგასმულია, რომ ხელოვნების სახლი არის სივრცე, რომელიც საზოგადოებრივ საპირფარეშოდ და ნაგავსაყრელად გამოიყენებოდა, ვიდრე 2016 წელს „ხელოვნების სახლის” გუნდმა დაიწყო სივრცის დასუფთავება და კამპანია მისი რეაბილიტაციისთვის. ამ პროცესში ჩართული იყო ასობით ადგილობრივი მოხალისე, საერთაშორისო და ადგილობრივი ორგანიზაცია, მათ შორის ევროკავშირის წარმომადგენლობა საქართველოში.

„გარდა ადამიანური რესურსისა, გამოყენებული იყო ჩვენი საკუთარი და დონორი ორგანიზაციების ფინანსური რესურსები. ხელოვნების სახლმა ამ პერიოდის მანძილზე ასობით ღონისძიებას უმასპინძლა, რაც მოიცავს გამოფენებს, ფესტივალებს, საჯარო ლექციებს, ვორკშოპებს, კინოჩვენებებს, სასწავლო კურსებს და ა.შ. ვიმუშავეთ 500-ზე მეტ არტისტთან და ყოველწლიურად ვმუშაობთ 1 000-ზე მეტ ახალგაზრდასთან, რამაც ქალაქი აქცია კულტურის მნიშვნელოვან კერად. ჩვენთვის ცხადია, რომ ეს პროცესი წარმოადგენს სიტყვისა და გამოხატვის თავისუფლების, შემოქმედებითი თავისუფლების შეზღუდვის მცდელობას, რომელიც საქართველოს კონსტიტუციით უნდა იყოს გარანტირებული! ჩვენ არ ვეთანხმებით გორის მერიის გადაწყვეტილებას და ვაპირებთ სამართლებრივ დავას ხელოვნების სახლის გადასარჩენად!“, — ნათქვამია განცხადებაში.

„ნეტგაზეთი“ დაუკავშირდა გორის მერიას, სადაც ჯერჯერობით კომენტარს არ აკეთებენ. პასუხის მიღების შემთხვევაში მასალა განახლდება.