მაკა ბოჭორიშვილი აშშ-ის სახელმწიფო დეპარტამენტის უფროს მრჩეველს შეხვდა

 „ქართული ოცნების“ საგარეო საქმეთა მინისტრი მაკა ბოჭორიშვილი 16 ივნისს აშშ-ის სახელმწიფო დეპარტამენტის უფროს მრჩეველს, უაით ტოლკეს შეხვდა. შეხვედრას ასევე ესწრებოდა აშშ-ის ელჩი საქართველოში, რობინ დანიგანი.

საქართველოს საგარეო საქმეთა სამინისტროს ინფორმაციით, „საუბარი შეეხო ამერიკის შეერთებულ შტატებსა და საქართველოს  შორის ურთიერთობებს, თანამშრომლობის პერსპექტივებს და რეგიონში მიმდინარე პროცესებს“.

„აღინიშნა, რომ საქართველო აშშ-ის მნიშვნელოვანი პარტნიორია. საგარეო საქმეთა მინისტრმა კიდევ ერთხელ ხაზგასმით აღნიშნა ქართული მხარის მზაობა ამერიკის შეერთებულ შტატებთან სტრატეგიული პარტნიორობის განახლებასთან დაკავშირებით“, – ნათქვამია საგარეო უწყების პრესრელიზში.

„მხარეებმა იმსჯელეს რეგიონსა და მსოფლიოში არსებულ უსაფრთხოების გამოწვევებზე. ხაზი გაესვა საქართველოს მნიშვნელოვან როლს რეგიონში მშვიდობისა და სტაბილურობის უზრუნველყოფის კუთხით“, – აცხადებს სამინისტრო.

This post is also available in: English