მარკო რუბიოს თქმით, ზელენსკიმ “ფიასკოს” გამო ბოდიში უნდა მოიხადოს

აშშ სახელმწიფო მდივანი მარკო რუბიო მიიჩნევს, რომ უკრაინის პრეზიდენტმა ვოლოდიმირ ზელენსკიმ ბოდიში უნდა მოიხადოს თეთრ სახლში “ფიასკოს” გამო.

“არ იყო იმის საჭიროება, რომ ანტაგონისტი გამხდარიყო. როცა ასე აგრესიულად იწყებ საუბარს და პრეზიდენტი [ტრამპი] გარიგებების შემოქმედია, მთელი ცხოვრება შეთანხმებებს დებს – ასე ვერ დასვამ ადამიანებს მაგიდასთან… ამის შემდეგ ყალიბდება აღქმა, რომ იქნებ ზელენსკის არ სურს სამშვიდობო შეთანხმება, ის ამბობს, რომ უნდა, მაგრამ იქნებ არ სურს’, – უთხრა რუბიომ CNN-ს

თეთრ სახლში უკრაინისა და აშშ-ის პრეზიდენტებს შორის შეხვედრა და დიალოგი მწვავე კამათის ფონზე წარიმართა. ტრამპმა შეხვედრის შემდეგ განაცხადა, რომ ზელენსკიმ უპატივცემულობა გამოავლინა თეთრი სახლის ოვალურ კაბინეტში.

„ძალიან მნიშვნელოვანი შეხვედრა გვქონდა დღეს თეთრ სახლში. ბევრ რამეს გაიგებ ასეთ შეხვედრაზე ისეთს, რასაც ვერასდროს მიხვდები საუბრის გარეშე ასეთ წნეხსა და დაძაბულობაში. შესანიშნავია, რომ ემოციებით ბევრ რამეს ავლენს. მე მივხვდი, რომ პრეზიდენტი ზელენსკი არ არის მზად მშვიდობისთვის, თუ ამერიკა ჩაერთვება საქმეში, რადგან მას ჰგონია, რომ ჩვენი ჩართულობა დიდ უპირატესობას აძლევს მოლაპარაკებებში. მე არ მინდა უპირატესობა, მე მინდა მშვიდობა. მან უპატივცემულობა გამოავლინა შეერთებული შტატებისადმი ჩვენთვის ძვირფას ოვალურ კაბინეტში. შეუძლია მაშინ დაბრუნდეს, როცა მშვიდობისთვის იქნება მზად“, — განაცხადა ტრამპმა ზელენსკისთან შეხვედრის შემდეგ.

რამდენიმე დღით ადრე ტრამპმა ზელენსკი დიქტატორად მოიხსენია. მერე კი, ჟურნალისტის კითხვის პასუხად, აღნიშნა, რომ არ სჯერა, უკრაინის პრეზიდენტს დიქტატორს არ უწოდებდა.

უკრაინის პრეზიდენტმა ვოლოდიმირ ზელენსკიმ, თეთრ სახლში ტრამპთან და ვიცე-პრეზიდენტ ჯეიდი ვანსთან დაძაბული შეხვედრის შემდეგ, ტელეკომპანია FOX-ის ეთერში ისაუბრა.

„გაგვიჭირდება თქვენი დახმარების გარეშე. თქვენი ხალხი ჩვენს ხალხს გადარჩენაში ეხმარება. ამიტომ ვართ აქ. ვწუხვარ იმ კამათის გამო [რაც თეთრ სახლში მოხდა]“, — თქვა ზელენსკიმ.

ჟურნალისტის კითხვაზე, მოუხდიდა თუ არა ბოდიშს დონალდ ტრამპს, მან უპასუხა, — „ღიად და გულახდილად უნდა ვილაპარაკოთ. მე არ მგონია, რომ რამე დავაშავეთ“.