მიხეილ სააკაშვილს 9 წლით თავისუფლების აღკვეთა მიუსაჯეს

საქართველოს ყოფილ პრეზიდენტს მიხეილ სააკაშვილს 12 მარტს ე.წ. „პიჯაკების“ საქმეზე 9 წლით თავისუფლების აღკვეთა მიუსაჯა. სასამართლომ იგი დიდი რაოდენობით საბიუჯეტო თანხების გაფლანგვაში დამნაშავედ ცნო.

მიხეილ სააკაშვილს, რომელიც 2003 წლიდან 2012 წლამდე საქართველოს პრეზიდენტი იყო, 2018 წელს სასამართლომ დაუსწრებლად დამნაშავედ ცნო უფლებამოსილების გადამეტებაში და ექვსი წლით თავისუფლების აღკვეთა შეუფარდა. იგი 2021 წელს საქართველოში დაბრუნების შემდეგ დააკავეს. ახალი განაჩენით მას პატიმრობაში ყოფნა 2030 წლამდე მოუწევს.

12 მარტს, მოსამართლე ბადრი კოჭლამაზაშვილმა ის დამნაშავედ ცნო 2009 წლიდან 2012 წლამდე სახელმწიფო ბიუჯეტიდან დაახლოებით ცხრა მილიონი ლარის გაფლანგვაში საკუთარი თავის, ახლობლების, მეგობრებისა და ოჯახის წევრების სასარგებლოდ. მას ბრალად ედებოდა სახელმწიფო დაცვის სპეციალური სამსახურის თანხების არამიზნობრივი ხარჯვა პირადი მიზნებისთვის, რაც სავარაუდოდ მოიცავდა ძვირადღირებული სასტუმროებისა და სპა სალონების მომსახურებით სარგებლობას, კოსმეტიკურ კლინიკებში ვიზიტებს, ტანსაცმლის შეძენას და სხვა.  

საქმეში კიდევ ერთი ბრალდებული, სახელმწიფო დაცვის სპეციალური სამსახურის ყოფილი უფროსი თეიმურაზ ჯანაშია 300 000 ლარით დაჯარიმდა. მოსამართლემ განაცხადა, რომ მან ვერ იპოვა მტკიცებულება, რომ ჯანაშიამ საბიუჯეტო თანხები დახარჯა, თუმცა მან „სამსახურეობრივი მდგომარეობა გამოიყენა საჯარო ინტერესების საწინააღმდეგოდ“.  

დაცვის მხარე, ერთიანი ნაციონალური მოძრაობის წარმომადგენლები და ზოგიერთი ოპოზიციური პარტია აცხადებენ, რომ საქმე პოლიტიკურად მოტივირებულია.

„მიხეილ სააკაშვილის, როგორც მთავარი ოპოზიციური ფიგურის, რეჟიმს ძალიან ეშინია. ყველაფერს აკეთებს, იმისთვის, რომ უზრუნველყოს მიხეილ სააკაშვილი დარჩეს საკანში“, – განაცხადა ნაციონალური მოძრაობის გენერალურმა მდივანმა პეტრე ცისკარიშვილმა.

უკრაინიდან დაბრუნებისთანავე სააკაშვილი, რომელსაც 2018 წელს უკვე შეუფარდეს პატიმრობა უფლებამოსილების ბოროტად გამოყენებისთვის, დააკავეს და მას შემდეგ პატიმრობაშია. რამდენიმეთვიანი შიმშილობის შემდეგ ყოფილი პრეზიდენტი კლინიკა „ვივამედში“ გადაიყვანეს, სადაც ის ამ დრომდე მკურნალობს.

This post is also available in: English (ინგლისური) Русский (რუსული)