მიხეილ ყაველაშვილმა იუსტიციის უმაღლესი საბჭოს ახალი წევრი დანიშნა

„ქართული ოცნების“ არჩეულმა პრეზიდენტმა მიხეილ ყაველაშვილმა მანუჩარ კაკოჩაშვილი ოთხი წლის ვადით იუსტიციის უმაღლესი საბჭოს არამოსამართლე წევრად დანიშნა. დანიშვნას წინ უძღოდა თბილისის საქალაქო სასამართლოს 12 მარტის გადაწყვეტილება, რომელმაც დააკმაყოფილა კაკოჩაშვილის საჩივარი და გააუქმა პრეზიდენტ სალომე ზურაბიშვილის ადრინდელი განკარგულება იუსტიციის უმაღლეს საბჭოში კახა წიქარიშვილის დანიშვნის შესახებ.

„საქმეში არსებული მასალების სრულყოფილად გაცნობის შედეგად, ცხადად გამოიკვეთა, რომ კახა წიქარიშვილის იუსტიციის უმაღლესი საბჭოს წევრად დანიშვნა განხორციელდა კანონმდებლობით გათვალისწინებული პროცედურული დარღვევებით“, – ნათქვამია მიხეილ ყაველაშვილის ადმინისტრაციის პრესრელიზში.  

2024 წლის 15 ივლისს პრეზიდენტმა სალომე ზურაბიშვილმა წიქარიშვილი იუსტიციის უმაღლესი საბჭოს არამოსამართლე წევრად დანიშნა. კაკოჩაშვილი, რომელიც ასევე იყო კანდიდატი, აპროტესტებდა მის დანიშვნას და ამტკიცებდა, რომ კანდიდატების შესარჩევი კომისია მიკერძოებული იყო და ერთმანეთთან დაახლოებული პირებისგან შედგებოდა. მან ასევე განაცხადა, რომ წიქარიშვილს შერჩევის პროცესში საკმარისი კითხვები არ დაუსვეს მისი კვალიფიკაციის შესახებ.

საქმის განხილვის შემდეგ სასამართლომ 2024 წლის 22 ივლისს პრეზიდენტ ზურაბიშვილის განკარგულება შეაჩერა. სასამართლომ დაადგინა, რომ წიქარიშვილის დანიშვნა პროცედურული დარღვევებით მოხდა. პრეზიდენტ ზურაბიშვილის საპარლამენტო მდივანმა გიორგი მსხილაძემ დაგმო სასამართლოს „უპრეცედენტო“ გადაწყვეტილება და მას პრეზიდენტის კონსტიტუციურ უფლებამოსილებაში „პირდაპირ“ და „უკანონო“ ჩარევა უწოდა.

საქართველოს კონსტიტუციის 52-ე მუხლის თანახმად, საქართველოს პრეზიდენტს უფლება აქვს დანიშნოს იუსტიციის უმაღლესი საბჭოს ერთი წევრი.

ასევე წაიკითხეთ:

• 15/07/2024 – პრეზიდენტმა იუსტიციის უმაღლესი საბჭოს არამოსამართლე წევრი დანიშნა
• 11/03/2024 – უზენაესი სასამართლო „ვეტინგის“ შესახებ ინიციატივას სასამართლოს დამოუკიდებლობის შელახვის საფრთხედ აფასებს

This post is also available in: English (ინგლისური) Русский (რუსული)