radiotavisupleba ახალი ამბები 
მოსკოვის სასამართლომ აშშ-ის მოქალაქეს, კონორ კენედის დაუსწრებლად შეუფარდა წინასწარი პატიმრობა. კენედიზე, რომელსაც რუსეთის ხელისუფლება უკრაინის შეიარაღებული ძალების მხარეს ბრძოლაში ადანაშაულებს, საერთაშორისო ძებნა გამოაცხადეს.
- 32 წლის კონორ კენედი აშშ-ის ჯანდაცვის მინისტრის, უმცროსი რობერტ ფრენსის კენედის ვაჟია.
- კონორ კენედის ბაბუა, რობერტ ფრენსის კენედი 1960-იან წლებში იყო ჯერ აშშ-ის გენერალური პროკურორი, შემდეგ კი - სენატორი.
- კონორ კენედის ბაბუის ძმა იყო აშშ-ის 35-ე პრეზიდენტი ჯონ კენედი.
რუსეთის სახელმწიფო სააგენტო „ტასის“ მიერ 12 აგვისტოს გავრცელებული ინფორმაციით, კონორ კენედისთვის პატიმრობის დაუსწრებლად შეფარდების შესახებ მოსკოვის ბასმანის რაიონის სასამართლოს გადაწყვეტილება ძალაში შევიდა მას შემდეგ, რაც საქალაქო სასამართლომ დაცვის მხარის სააპელაციო საჩივარი არ დააკმაყოფილა.
კონორ კენედის წინააღმდეგ სისხლის სამართლის საქმე აღძრულია დაქირავებულის სტატუსით საბრძოლო მოქმედებებში მონაწილეობის მუხლით, რაც 7-დან 10 წლამდე პატიმრობას ითვალისწინებს.
თავად კონორ კენედიმ ჯერ კიდევ 2022 წლის ოქტომბერში ინსტაგრამზე დაწერა, რომ ღრმად შეძრა იმან, რაც უკრაინაში ხდებოდა, დახმარება გადაწყვიტა და როცა უკრაინის საერთაშორისო ლეგიონის არსებობა შეიტყო, გაემგზავრა და ლეგიონს შეუერთდა. ამ პოსტის მიხედვით, კონორ კენედი უკრაინიდან სამშობლოში უკვე დაბრუნებული იყო.
