ოხანაშვილმა სახელმწიფო უსაფრთხოების სამსახურში თავისი მოადგილეები წარადგინა

„ქართული ოცნების“ სახელმწიფო უსაფრთხოების სამსახურის ახლადდანიშნულმა უფროსმა, ანრი ოხანაშვილმა, რომელმაც ამ პოსტზე კვირის დასაწყისში გრიგოლ ლილუაშვილი შეცვალა, 5 აპრილს სამი მოადგილე, მათ შორის ირაკლი ბერაია, გელა გელაძე და ლევან ხარანაული წარადგინა.

ირაკლი ბერაია საქართველოს დაზვერვის სამსახურის უფროსად 2024 წლის 5 აპრილს დაინიშნა. „ქართული ოცნების“ დიდი ხნის წევრი, ბერაია პარლამენტში 2016 წელს შევიდა. 2016 წლიდან 2019 წლამდე იყო პარლამენტის თავდაცვისა და უშიშროების კომიტეტის თავმჯდომარის პირველი მოადგილე. 2015 წლიდან 2016 წლამდე ხელმძღვანელობდა სახელმწიფო უსაფრთხოების სამსახურის საინფორმაციო და ანალიტიკურ დეპარტამენტს. კარიერის დასაწყისში იგი შინაგან საქმეთა სამინისტროში ხელმძღვანელ თანამდებობებს იკავებდა, სადაც 2012 წლიდან 2015 წლამდე რეფორმებისა და განვითარების დეპარტამენტს ხელმძღვანელობდა. უფრო ადრე, 2007 წელს ეკონომიკური განვითარების სამინისტროს ეროვნული საინვესტიციო სააგენტოს ხელმძღვანელად მუშაობდა.

ბერაია 2023 წლის ოქტომბერში დაპირისპირების ცენტრში მოექცა მას შემდეგ, რაც დამოუკიდებელ დეპუტატ თეონა აქუბარდიას პარლამენტის სხდომაზე სიტყვიერი შეურაცხყოფა მიაყენა მას შემდეგ, რაც ამ უკანასკნელმა საქართველოს დელეგაცია გააკრიტიკა იმის გამო, რომ ნატოს საპარლამენტო ასამბლეაზე საქართველოს მხარდამჭერ შესწორებას მხარი არ დაუჭირა. ბერაიამ მაშინ განაცხადა: „მოვუწოდებ ამ ადამიანს, მისი გრძელი და ყველგან ნამყოფი ენით ჩემი და ჩემი კომიტეტის ხსენებისგან თავი შეიკავოს“.

კიდევ ერთი მოადგილე გელა გელაძე განათლებისა და მეცნიერების მინისტრის მოადგილის თანამდებობას 2023 წლიდან იკავებდა. 2018 წლიდან 2023 წლამდე საქართველოს განათლებისა და მეცნიერების სამინისტროს საგანმანათლებლო დაწესებულების მანდატურის სამსახურის უფროსი იყო, ხოლო მანამდე, 2016-2018 წლებში შინაგან საქმეთა სამინისტროს ცენტრალური კრიმინალური პოლიციის დეპარტამენტი, სამმართველოს უფროსად მსახურობდა. 2012-2016 წლებში იგი საქართველოს სასჯელაღსრულებისა და პრობაციის სამინისტროს პრობაციის ეროვნული სააგენტოს უფროსის მოადგილის თანამდებობას იკავებდა.

მესამე მოადგილე ლევან ხარანაული მანამდე ოხანაშვილის ხელმძღვანელობით იუსტიციის სამინისტროში მუშაობდა, სადაც მინისტრის მოადგილე იყო. ხარანაული, რომელსაც სამართლის დოქტორის ხარისხი აქვს, ასევე თბილისის სახელმწიფო უნივერსიტეტის იურიდიული ფაკულტეტის ასოცირებული პროფესორია.

2 აპრილს „ქართული ოცნების“ პრემიერ-მინისტრმა ირაკლი კობახიძემ სახელმწიფო უსაფრთხოების სამსახურის უფროსად ანრი ოხანაშვილი დანიშნა. ოხანაშვილი მანამდე იუსტიციის მინისტრად, უფრო ადრე კი პარლამენტის იურიდიულ საკითხთა კომიტეტის თავმჯდომარედ მუშაობდა.

ასევე წაიკითხეთ:

• 04/04/2025 – „ქართულმა ოცნებამ“ ლილუაშვილის მინისტრად დანიშვნა გადაიფიქრა
• 02/04/2025 – „ქართული ოცნების“ მთავრობაში ცვლილებები გამოცხადდა
• 25/11/2024 – პრემიერ-მინისტრმა მთავრობის სამი ახალი წევრი წარადგინა
• 25/09/2024 – კულტურის მინისტრი თეა წულუკიანი თანამდებობას ტოვებს

This post is also available in: English (ინგლისური)