პატიმარ დავით ფეიქრიშვილის ჯანმრთელობის დაზიანებაზე გამოძიება დაიწყო 

იუსტიციის სამინისტრო აცხადებს, რომ 20 ოქტომბერს მასმედიის საშუალებებით საჯაროდ გავრცელებული ინფორმაციის საფუძველზე, პატიმარ დავით ფეიქრიშვილის ჯანმრთელობის დაზიანების ფაქტზე გამოძიება დაიწყო.

უწყების ცნობით, გამოძიება საქართველოს სისხლის სამართლის კოდექსის 126-ე მუხლის პირველი ნაწილით მიმდინარეობს. ეს მუხლი ძალადობას გულისხმობს.

„საქმის გარემოებების სრულყოფილი და ობიექტური შესწავლის მიზნით, მიმდინარეობს კანონმდებლობით გათვალისწინებული შესაბამისი საგამოძიებო და საპროცესო მოქმედებები“, – წერია უწყების განცხადებაში.

დავით ფეიქრიშვილი ამჟამად კლინიკა „ვივამედშია“ გადაყვანილი. ის ბოლო 24 საათში კლინიკაში მეორედ შეიყვანეს.

დავით ფეიქრიშვილის ადვოკატი, პაატა გოგიაშვილი აცხადებს, რომ მისი დაცვის ქვეშ მყოფს ფიზიკური დაზიანებები რამდენიმე პირმა მიაყენა, მათ შორის ვატო ყიფიანმა და „კაწრომ“. ადვოკატმა ასევე თქვა, რომ დავით ფეიქრიშვილმა თვითდაზიანება მიიყენა, გარდა ამისა, მისი განცხადებით, 19 ოქტომბერს ვენები გადაიჭრა მისმა ძმამ, გიორგი ფეიქრიშვილმაც.

კლინიკა „ვივამედის“ კლინიკური დირექტორი, ზურაბ ჩხაიძე „ნეტგაზეთთან“ ადასტურებს, რომ გუშინ, 19 ოქტომბერს კლინიკაში გადაყვანილი იყო პატიმარი დავით ფეიქრიშვილი.

ადვოკატის განცხადებით, მას დამტვრეული ჰქონდა ნეკნები, სახის ძვლები, დაზიანებული ჰქონდა თავის ქალა.

• პენიტენციურმა სამსახურმა კვლავ უარყო დავით ფეიქრიშვილის ცემა.
• ადვოკატის განცხადებით, დავით ფეიქრიშვილის ბრალდებებს უარყოფს ვატო ყიფიანიც. უფლებადამცველმა თქვა, რომ ყიფიანი და ფეიქრიშვილი ერთ საკანში არ არიან და რომ მას ძმებთან მე-8 დაწესებულებაში კომუნიკაცია არ ჰქონია.