პოლიტიკოსები უკრაინაში რუსეთის სრულმასშტაბიანი შეჭრის მესამე წლისთავს ეხმიანებიან

ქართველმა დემონსტრანტებმა, პოლიტიკოსებმა და სამოქალაქო საზოგადოების წარმომადგენლებმა 24 თებერვალს უკრაინაში რუსეთის სრულმასშტაბიანი შეჭრის მესამე წლისთავი აღნიშნეს და ომით განადგურებულ ქვეყანას სოლიდარობა გამოუცხადეს. კიევში უკრაინის პარტნიორების მაღალი დონის სამიტი გაიმართა, სადაც ათობით ქვეყნის ლიდერები შეიკრიბნენ, როგორც ფიზიკურად, ისე ვიდეო ჩართვის საშუალებით. კანადის, ბალტიისპირეთის ქვეყნებისა და სხვა ქვეყნების ლიდერები, ასევე ევროკომისიის პრეზიდენტი ურსულა ფონ დერ ლაიენი კიევში ჩავიდნენ მხარდაჭერის გამოსახატავად. საქართველოს ოფიციალური დელეგაცია ამ მხარდაჭერას არ შეუერთდა.

თბილისში სოლიდარობის აქცია სამოქალაქო საზოგადოების ორგანიზაციების, პროტესტი 24-ისა და საბჭოთა წარსულის კვლევის ლაბორატორიის მიერ გაიმართა. ორგანიზატორებმა ხაზი გაუსვეს ომის უფრო ფართო კონტექსტს და განაცხადეს: „ამ ომის დასარულზეა დამოკიდებული არა მარტო ევროპის ბედი, არამედ კონკრეტულად საქართველოს უსაფრთხოებაც. უკრაინა იბრძვის დამოუკიდებლობისათვის და ფარად უდგას პუტინის შემდგომ სამიზნეებს. მათ შორის, ერთ-ერთი პირველი საქართველოა“.

აქცია 19:00 საათზე უკრაინის საელჩოსთან დაიწყო. აქციის მონაწილეებმა პატივი მიაგეს როგორც უკრაინულ წინააღმდეგობას, ასევე ომში დაღუპულ ქართველ მოხალისეებს. შემდეგ მონაწილეები რუსთაველის გამზირზე გაემართნენ უკრაინისადმი მხარდაჭერის გამოხატვის მიზნით. მათ ხელში ეკავათ უკრაინის, საქართველოსა და ევროკავშირის დროშები და ბანერები წარწერით „რუსეთი ტერორისტული სახელმწიფოა“ და „დიდება უკრაინას“. მსგავსი სოლიდარობის მსვლელობები თბილისში 2023 და 2024 წლებშიც გაიმართა.

უკრაინის მიმართ სოლიდარობის აქციები ევროპის მასშტაბით გაიმართა, მათ შორის ბრიუსელში, ჟენევასა და პრაღაში.

„სამოქალაქო საქართველო“ უკრაინაში რუსეთის შეჭრის მესამე წლისთავთან დაკავშირებით ქართველი პოლიტიკოსების განცხადებებს გთავაზობთ:

პრეზიდენტი სალომე ზურაბიშვილი: „დღეს, უკრაინის წინააღმდეგ რუსეთის აგრესიის დაწყებიდან სამი წლის თავზე, საქართველო, ქართველი ხალხი უკრაინის გვერდით დგას. როცა მშვიდობაზეა საუბარი, ყველაზე მთავარი ის არის, რომ ამ ომის მსხვერპლი, რომელმაც ამდენი დღე გადაიტანა, როცა უკრაინელები იბრძოდნენ თავიანთი ტერიტორიისთვის, თავისუფლებისთვის, დამოუკიდებლობისთვის, რომ მშვიდობა იყოს სამართლიანი და პატიოსანი. რადგან სხვაგვარად, არ არსებობს ხანგრძლივი მშვიდობა. ეს მშვიდობა უნდა იყოს უკრაინასთან, უკრაინის მონაწილეობით, ევროპელების მონაწილეობით, რომლებიც ასევე ზრუნავენ თავიანთი თავისუფლებისა და მომავლისთვის. საქართველო დგას თქვენ გვერდით ამ ძალიან მნიშვნელოვან დროს. საქართველო გისურვებთ მშვიდობას, რომელიც გაგრძელდება და იქნება მშვიდობა მთელი ევროპისთვის. ვიცით, რომ ერთნაირ ბრძოლაში ვართ. ჩვენთან ომი ჰიბრიდულია, მაგრამ მაინც ომია. ჩვენ ასევე ვიმსახურებთ სამართლიან და ხანგრძლივ მშვიდობას, ყველა ერთად თავისუფალ და დამოუკიდებელ ევროპაში“.

მმართველი გუნდი

„ქართული ოცნების“ პრემიერმინისტრი ირაკლი კობახიძე: „სამი წელი შესრულდა დღეს უკრაინაში ომის დაწყებიდან. ეს არის ნამდვილად ტრაგიკული თარიღი ჩვენი მეგობარი ქვეყნის, უკრაინის ისტორიაში. ძალიან მძიმეა ომის შედეგები ჩვენი მეგობარი ქვეყნისთვის, ჩვენი მეგობარი ხალხისთვის. უამრავი ადამიანია დაღუპული ამ ომის შედეგად. ათ მილიონამდე უკრაინელი იქცა დევნილად, ლტოლვილად. უკრაინის ტერიტორიების 20% დღეს არის ოკუპირებული რუსეთის ფედერაციის მიერ, განადგურებულია ინფრასტრუქტურა, ეკონომიკა, ენერგეტიკა. უკრაინის საგარეო ვალი აღწევს ეკონომიკის თითქმის 100%-ს. 96%-ია წლევანდელი მაჩვენებელი და წლის ბოლოსთვის უკვე გადასცდება 100%-ს ეს მაჩვენებელი. ჩვენ ჩვენს მეგობარ ქვეყანას, მეგობარ ხალხს ვუსურვებთ, პირველ რიგში, მშვიდობას. პრინციპულად მნიშვნელოვანია, რაც შეიძლება სწრაფად, წარმატებით დასრულდეს ის პროცესი, რომელიც არის დაწყებული და რომელიც უკავშირდება უკრაინაში მშვიდობის დამყარებას. კიდევ ერთხელ მინდა, გამოვთქვა იმედი, რომ რაც შეიძლება მალე დამყარდება მშვიდობა ჩვენს მეგობარ ქვეყანაში, უკრაინაში”.

„ქართული ოცნების“ პარლამენტის თავმჯდომარე შალვა პაპუაშვილი: „უკრაინის ომის მესამე წლისთავზე საქართველოს ხელისუფლებას შეუძლია თამამად გაუსწოროს თვალი ქართველ ხალხს, ვინაიდან ჩვენ ჩვენი ღირებულებების, პრინციპებისა და რწმენების ერთგულნი დავრჩით. ამიტომაცაა, რომ, გასული წლის ოქტომბერში, მეოთხედ აგვირჩიეს ხელისუფლებაში… ომის დაწყების შემდეგ საქართველოს მთავრობამ სრული სოლიდარობა გამოუცხადა უკრაინელ ხალხს: ვიყავით თანაავტორი და ხელმომწერი ყველა საერთაშორისო პოლიტიკური და სამართლებრივი დოკუმენტისა, რომელიც რუსულ აგრესიას გმობდა;  გამოვრიცხეთ რუსეთზე დადებული საერთაშორისო სანქციების გვერდის ავლის ნებისმიერი მცდელობა; მივაწოდეთ ჰუმანიტარული დახმარება უკრაინას; შევიფარეთ ათიათასობით უკრაინელი ლტოლვილი, ოკუპირებული ტერიტორიებიდან დევნილ ჩვენს 300,000 იძულებით გადაადგილებულ პირთან ერთად. თუმცა, ღია და ფარული წნეხის მიუხედავად, ჩვენ არ დაგვიწესებია ორმხრივი სანქციები რუსეთისათვის და არც სახმელეთო და საჰაერო მიმოსვლა შეგვიზღუდავს, ვინაიდან, ნათელი იყო, რომ ამგვარი ესკალაცია რუსეთისათვის საგრძნობი საერთოდ არ იქნებოდა, საქართველოსთვის კი, უსაფრთხოებისა და ეკონომიკური ხასიათის საერთაშორისო გარანტიების არარსებობის პირობებში, ეკონომიკურ კოლსაფსსა და ახალ ომს გამოიწვევდა. უკრაინის მიმართ ჩვენი ქმედითი სოლიდარობის მიუხედავად, ზელენსკის ადმინისტრაციის მხრიდან საპასუხო ნაბიჯები გაუგებარი აღმოჩნდა. ომის დაწყებიდან ერთი კვირის შემდეგ უკრაინის მთავრობამ საქართველოდან ელჩი გაიწვია, თავად ზელენსკიმ კი საქართველოს პარლამენტის წინ შეკრებილ საპროტესტო შეკრებას მიმართა სიტყვებით, რომ „ქართველი ხალხი უკეთესი იყო, ვიდრე საქართველოს ხელისუფლება“, რითაც ცხადად წააქეზა საქართველოს ხელისუფლების საწინააღმდეგო პროტესტი. უკრაინელმა ოფიციალურმა პირებმა, მათ შორის პრეზიდენტის უსაფრთხოების მრჩეველმა, ღიად მოგვიწოდეს, ძალით დაგვებრუნებინა აფხაზეთი და ცხვინვალის რეგიონი. კარგად გვახსოვს უკრაინის ხელისუფლებასთან უნისონში მოქმედი რადიკალური ოპოზიცია და მათთან დაკავშირებული არასამთავრობო ორგანიზაციების განცხადებები, რომ „ბომბები ერჩივნათ იმ სირცხვილს“, რომელიც საქართველოს ხელისუფლების პოლიტიკამ გამოიწვია… ამის მსგავსად, ბოლო რამდენიმე წლის განმავლობაში, გვიბიძგებდნენ იქითკენ, რომ ჩვენი ეროვნული ინტერესები ახალი ფსევდოლიბერალური ინტერნაციონალის გაუგებარი მოთხოვნებისთვის დაგვექვემდებარებინა. ეს არ მოხდება, მით უმეტეს, „ქართული ოცნების“ მმართველობისას“.

ოპოზიცია

ახალი/კოალიცია ცვლილებისთვის: „3 წლის წინ ოკუპანტმა რუსეთმა სრულმასშტაბიანი აგრესია დაიწყო უკრაინის წინააღმდეგ. 3 წლის თავზე, ჩვენმა საერთო მტერმა ვერც ერთ დასახულ მიზანს ვერ მიაღწია. წინააღმდეგობის, გმირობის, თავისუფლებისთვის ბრძოლის 3 წელი. დიდება უკრაინას! დიდება უკრაინელ და ქართველ გმირებს! Все буде Україна!“

ხატია დეკანოიძე, „ერთიანობა -ნაციონალური მოძრაობა“: „წინააღმდეგობის სამი წელი! დღეს, უკრაინის საელჩოსთან, საღამოს 7 საათზე მისვლა მნიშვნელოვანია. თავისუფლებას იცავს უკრაინა. სამი წელი აკავებს ურდოს. Слава Україні!🇺🇦“

„ძლიერი საქართველო“: „გამარჯვება უკრაინას! დიდება გმირებს!“

გიორგი გახარია, პარტია „საქართველოსთვის“: „სამი წელია, რაც უკრაინა, განსაკუთრებული სიმამაცითა და თავდადებით, ებრძვის ამ საუკუნის ყველაზე სასტიკ შემოჭრას. უკრაინელი ერის გადაწყვეტილება, დაიცვას თავისი თავისუფლება და ევროპული მომავალი, შთააგონებს თავისუფალ სამყაროს. უკრაინა იმსახურებს სამართლიან და ხანგრძლივ მშვიდობას, რომელიც ჩვენ ერთობლივი ძალისხმევით უნდა უზრუნველვყოთ“.

ასევე წაიკითხეთ:

• 24/02/2024 – საქართველოს ლიდერები და პოლიტიკოსები უკრაინაში ომის დაწყების მეორე წლისთავს ეხმიანებიან
• 24/02/2023 – უკრაინის ომის წლისთავისადმი მიძღვნილ მიღებაზე პრეზიდენტმა მთავრობა გააკრიტიკა

This post is also available in: English (ინგლისური) Русский (რუსული)