პოლიცია უნდა ატარებდეს მაიდენტიფიცირებელ ნიშანს, გადაცდომები უნდა იყოს გამოძიებული – ევროკომისარი

1

ევროსაბჭოს ადამიანის უფლებთა კომისარი საქართველოში მძიმე მდგომარეობაზე დასკვნას აქვეყნებს – მაიკლ ო-ფლაერტი წერს, რომ ყველა სამართალდამცავი უნდა ატარებდეს თვალსაჩინო და ინდივიდუალურად გამორჩეულ მაიდენტიფიცირებელ ნიშანს, მოქალაქეებს უნდა უადვილდებოდეთ მათი ამოცნობა და როდესაც ხდება გადაცდომები, მათ პასუხი უნდა აგონ.

კომისარი საქართველოში იანვარში იმყოფებოდა, დოკუმენტის თანახმად, ო-ფლაერტი შეხვდა პროკურორის მოადგილეს, სპეციალური საგამოძიებო სამსახურის უფროსს კოკა კაციტაძეს და მას ჰკითხა დაუსვა – რატომ ვერ ხდება სამართალდამრღვევი სამართალდამცველების დასჯა? – პასუხად თავის მართლება მიიღო. ორივე მაღალჩინოსანი უმტკიცებდა, რომ გამოძიება მიმდინარეობს, თუმცა ვერავის სჯიან, რადგან იდენტრიფიცირება უჭირთ. 

როგორც მაიკლ ო’ფლაერტის მიერ საქართველოში ადამიანის უფლებების მდგომარეობის შესახებ გამოქვეყნებულ მემორანდუმში აღნიშნული,

დემონსტრანტებისა და ჟურნალისტების წინააღმდეგ არასათანადო მოპყრობის სარწმუნო ცნობების მიუხედავად, ძალადობისთვის არც ერთი სამართალდამცავი პირის პასუხისმგებლობის საკითხი არ დამდგარა. მეტიც, პროტესტის ზოგიერთი მონაწილის წინააღმდეგ სისხლისსამართლებრივი დევნა მიმდინარეობს.

კომისრის რეკომენდაციაში ვკითხულობთ:

• ყველა სამართალდამცავი პერსონალი უნდა ატარებდეს თვალსაჩინო და ინდივიდუალურად გამორჩეული მაიდენტიფიცირებელ ნიშანს.
• გარანტია, რომ ყველა ჟურნალისტს თავისუფლად და უსაფრთხოდ შეეძლება აქციებისა და სხვა საჯარო შეკრებების გაშუქება.

მაიკლ ო’ფლაერტი რეკომენდაციის სახით საქართველოს ხელისუფლებას დემონსტრანტების წინააღმდეგ არასათანადო მოპყრობის შემთხვევების ეფექტური გამოძიების უზრუნველსაყოფად, ყველა საჭირო ზომის მიღებისკენ მოუწოდებს, მათ შორის სპეციალური საგამოძიებო სამსახურის დამოუკიდებლობისა და ეფექტურობის გაძლიერების გზით.

კომისარი ასევე შეშფოთებას გამოხატავს შეკრების თავისუფლების შესახებ კანონში შეტანილი ცვლილებების შესახებ, რომელიც “დემონსტრანტების წინააღმდეგ ზედმეტ შეზღუდვებს აწესებს, აფართოებს სამართალდამცავი ორგანოების უფლებამოსილებებს და პროტესტთან დაკავშირებული ადმინისტრაციული სამართალდარღვევებისთვის უფრო მკაცრ ჯარიმებს აწესებს”.

• მემორანდუმში ასევე საუბარია მზია ამაღლობელის საქმეზეც. კომისრის შეფასებით ჟურნალისტის დაკავება გაუმართლებელია და დამოუკიდებელი ჟურნალისტიკისთვის რთულ პერიოდს ასახავს.

აქციაზე სასტიკად ნაცემი და ნაწამები მომიტინგეები “პირველებთან” იხსენებენ, რომ სამართალდამცეველებს რაიმე მაიდენტიფიცირებელი ნიშანი ფორმაზე ან ჩაფხუტზე არ ჰქონიათ.

ერეკლე ლოლაძე ამბობს, რომ გომელაურის რაზმის თანამშრომლებმა მასზე ძალადობა დაკავების მომენტშივე დაიწყეს.

პირველად, თავიდან დაკავება მოხდა დაახლოებით 20-30 ადამიანის მიერ, მერე გადაგვიყვანეს, გარკვეული მანძილი რომ გავიარეთ უკვე სხვადასხვა პირებსაც ვხვდებოთ, აქ დამატებით 20-30 ადამიანი კიდევ იქნებოდა. დაკავების ნაწილში ასე უცხო თვალით რთულია ვინმეს იდენტიფიცირება მოახდინო, მხოლოდ თვალები იყო რაც შეიძლებოდა გეცნო ადამიანის. დანარჩენი მაიდენტიფიცირებელი რაიმე ნიშანი ფორმაზე ან ჩაფხუტზე არცერთს არ ჰქონია, მხოლოდ შავი ფორმები. ძალადობა დაკავების მომენტშივე დაიწყეს. ფაქტიურად, სანამ საპატრულოს ეკიპაჟს გადაგვცემდნენ, იქამდე მუდმივად, დაახლოებით 15 წუთის განმავლობაში მაინც ფიზიკურ ძალადობას ჰქონდა ადგილი. აბსოლუტურად ყველა მათგანი, ვისთანაც შეხება გვქონდა, ჯამში მინიმუმ 30 ადამიანი მაინც ფიზიკურად გვისწორდებოდა. მხოლოდ ერთადერთი შეხვედრა გვქონდა სპეციალურ საგამოძიებო სამსახუში. იმის შემდეგ არაფერი არ გვქონია არც მათი მხრიდან, არც ჩვენი მხრიდან.