რა სთხოვეს და რა არ სთხოვეს ჯარს? – “ასეთი დავალება ამ ეტაპისათვის არ არის” – თავდაცვის მინისტრი

308

მას შემდეგ, რაც მოქალაქეებმა და არამხოლოდ, იკითხეს, რატომ ვერ წმენდს თავდაცვის ძალები სოფლებამდე მისასვლელ გზებს, თავდაცვის სამინისტრო მინისტრის განცხადებას ავრცელებს. განცხადება ბუნდოვანია, მინისტრი ამბობს, რომ ასეულობით სამხედროა მობილიზებული, ასეულობით, შეიძლება იყოს 200 სამხედროც და შეიძლება იყოს 900 სამხედროც. მინისტრი ამბობს, რომ სხვა საჭიროების შემთხვევაში, თუ დავალებას მიიღებენ, ჩაერთვებიან, ვრცელდება ინფორმაცია, რომ სოფლები ისევ მოწყვეტილია გარესამყაროს, რა საჭიროება უნდა შეიქმნას კიდევ დამატებით, უცნობია.

იგი ამბობს, რომ დღეს მისი, თავდაცვის ამოცანაა მივიდეს თითოეულ დასახლებულ პუნტქში, თუმცა, თავდაცვის ძალების ჩართვიდან, უკვე ლამის 24 საათი გადის და არ არიან თითოეულ პუნტქში შესულები, მინისტრი არ ამბობს, თუ ეს ამოცანა შეუსრულებელია, რატომ არ იყენებს მეტ ტექნიკას და მეტ ფიზიკურ ძალას, ისევე როგორც არ ამბობს, ამ ამოცანის შესასრულებლად, რა დროის შემდეგ გეგმავს, იქნებ აქვს ინფორმაცია, რომ სახლები გაუძლებენ თოვლს, ან თოვლში ჩარჩენილ ადამიანებს აქვთ საკვები, წყალი, გათბობა, მედიკამენტები და არაა მათთან მისვლა სასწრაფო?

რჩება, თუ არა, შთაბეჭდილება, რომ მინისტრი თავს იმართლებს და ე,წ, საკოორდინაციო შტაბისკენ, ან კობახიძისკენ იშვერს ხელს, რომ ისინი არ რთავენ ნებას, მეტი ტექნიკა, ან მეტი ჯარისკაცი გამოიყვანოს, ეს მკითხველმა განსაჯოს მინისტრის განცხადებიდან გამომდინარე.

„რამდენიმე ასეული სამხედროა მობილიზებული. სხვა საჭიროების შემთხვევაში, მაქსიმალურად ჩავერთვებით. თუმცა, ასეთი დავალება ამ ეტაპისათვის არ არის.

დღეს ჩვენი ამოცანაა, დავეხმაროთ შსს-ს და სხვა მუნიციპალურ სამსახურებს, რათა შესაძლებელი გახდეს, მივიდეთ თითოეულ დასახლებულ პუნქტში და კონკრეტული ოჯახებს დახმარება გავუწიოთ. ამ ეტაპზე არსებული ამოცანების მიხედვით, ჩვენ მიერ მობილიზებული ძალები სრულიად საკმარისია, თუმცა, საჭიროების შემთხვევაში, რამდენიმე საათში შევძლებთ დამატებითი ძალების მობილიზებას“, – განაცხადა ვიცე-პრემიერმა, თავდაცვის მინისტრმა ირაკლი
ჩიქოვანმა დიდთოვლობის გამო წარმოქმნილ საგანგებო სიტუაციაში თავდაცვის ჩართულობასთან დაკავშირებით.