რა უნდა ვიცოდეთ მეტაპნევმოვირუსის შესახებ – რა არის და რამდენად საშიშია HMPV-ის გავრცელება?

9 hours ago 3

პაციენტები საავადმყოფოში გადასხმის სისტემებით, რიგები, დეზინფექცია თავშეყრის ადგილებში – ჩინეთში მეტაპნევმოვირუსის [HMPV] აფეთქებას ებრძვიან. გავრცელებული ფოტო და ვიდეო ბევრს კორონავირუსის პანდემიის დასაწყისს ახსენებს. რა უნდა ვიცოდეთ ამ ვირუსის შესახებ და გვაქვს თუ არა სანერვიულო?

ინდოეთი, მალაიზია, ჰონგ-კონგი, რუსეთი – HMPV-ით გამოწვეული ინფექციების შემთხვევათა ზრდა არაერთ სხვა ქვეყანაშიც შეიმჩნევა. პროცესებს ყურადღებით აკვირდებიან ევროპასა და აშშ-ში. ჯანდაცვის ორგანიზაციები მოსახლეობას სპეციალურ რჩევებს აძლევენ.

ჯანმრთელობის მსოფლიო ორგანიზაცია პანდემიას არ მოელის.

რამდენად საშიშია HMPV?

ჩინეთიდან და სხვა ქვეყნებიდან გავრცელებული ფოტო- და ვიდეომასალები ადამიანებს 5 წლის წინანდელ მოვლენებს ახსენებს, როდესაც კორონავირუსის (SARS-CoV-2) პანდემია იკრებდა ძალებს და შემდეგ მან მსოფლიოს თითქმის ყველა ქვეყნის მოსახლეობა ცხოვრების ჩვეულ რიტმს წლობით ჩამოაშორა.

მაგრამ, SARS-CoV-2-ისგან განსხვავებით, HMPV მსოფლიოში უკვე თითქმის 25 წელია ცირკულირებს და ამ ვირუსით გამოწვეული რესპირატორული დაავადების მიმდინარეობა გაცილებით მსუბუქია.

მედიკოსები კიდევ რამდენიმე განმასხვავებელ გარემოებას გამოყოფენ:

როცა კორონავირუსი (SARS-CoV-2) პირველად გამოჩნდა, მას არავინ იცნობდა და, შესაბამისად, იმუნიტეტი არავის ჰქონდა, ხოლო HMPV-ს მსოფლიო უკვე თითქმის 25 წელია იცნობს.
2001 წელს აღმოჩენილი HMPV, თავისი გართულებებით, კორონავირუსის მსგავსად სახიფათო არასოდეს ყოფილა.

„მეტაპნევმოვირუსმა [HMPV] შესაძლოა გამოიწვიოს ზედა და ქვედა სასუნთქი გზების დაავადებები ყველა ასაკის ადამიანებში, განსაკუთრებით პატარა ბავშვებში, ხანდაზმულებსა და სუსტი იმუნური სისტემის მქონე ადამიანებში“, – ვკითხულობთ დაავადებათა კონტროლისა და პრევენციის ცენტრის – CDC-ის ოფიციალურ ვებსაიტზე.

უფრო კონკრეტულად, გართულებათა რისკჯგუფებში შედიან: ბავშვები 5 წლის ასაკამდე, 65 წელს გადაშორებულები და სხვადასხვა დაავადების მქონე ადამიანები. ასევე, პრაქტიკა ადასტურებს, რომ გართულებების თვალსაზრისით, ყველაზე მოწყვლად ჯგუფს წარმოადგენენ 2 წლამდე ბავშვები. ფრთხილად უნდა იყვნენ ორსულებიც.

როგორია HMPV-ს სიმპტომები?

HMPV-ს სიმპტომებია: ხველა, სურდო, სხეულის ტემპერატურის მცირედი მომატება, სისუსტე და ზოგ შემთხვევებში – სუნთქვის გაძნელება. ძირითად შემთხვევებში, დაავადების სიმპტომები, მედიკამენტების გარეშე, ერთ კვირაში უკვალოდ ქრება.

HMPV-ს ინკუბაციის პერიოდი 3-6 დღეა.

HMPV-ი შესაძლოა არაერთხელ შეხვდეს ადამიანს, მაგრამ, როგორც სპეციალისტები განმარტავენ – მიმდინარეობა ასეთ შემთხვევაში მსუბუქია.

მეტაპნევმოვირუსი [HMPV] გადამდებია როგორც ჰაერწვეთოვანი გზით – ადამიანიდან ადამიანზე, ისე რაიმე საგნის ზედაპირიდან ადამიანზე, თუკი ზედაპირი ვირუსით დაბინძურებულია.

შესაბამისად, ექიმების რჩევაა პირბადის ტარება თავშეყრის ადგილებში, მათ შორის, ტრანსპორტში და, ასევე, ხელების ხშირად დაბანა.