რასა იუკნევიჩიენე ევროკავშირისგან ვახო სანაიას დაპატიმრებაზე რეაგირებას ითხოვს

ლიეტუველი ევროპარლამენტარი ევროპის სახალხო პატიიდან (EPP), საქართველოს საკითხებზე მომხსენებელი რასა იუკნევიჩიენე ჟურნალისტ ვახო სანაიას დაკავების ფაქტზე ევროკავშირისგან რეაგირებას ითხოვს.

„ჟურნალისტ ვახო სანაიასთვის Facebook-პოსტის გამო 14-დღიანი პატიმრობის მისჯა აჩვენებს, თუ რა სისწრაფით ეშვება საქართველო კრემლის სტილის რეპრესიების მორევში. ამ ტემპით, ბიძინა ივანიშვილი მალე მოსკოვში მყოფ თავის პატრონებსაც კი გადაუსწრებს. ევროკავშირმა ამაზე რეაგირება უნდა მოახდინოს“, — წერს იუკნევიჩიენე X-ზე და სოლიდარობა უცხადებს დაკავებულ ჟურნალისტს.

სანაიას დაკავებას EPP-ის კიდევ ერთი წევრი, გერმანელი მიხაილ გალერიც გამოეხმაურა.

„ტელეკომპანია „ფორმულას“ ჟურნალისტი ვახო სანაია Facebook-ზე პოსტის გამო 14 დღით დააპატიმრეს. რამდენადაც დამამშვიდებელი არაა ის ფაქტი, რომ რუსეთში მას გაცილებით მეტს მიუსჯიდნენ, ეს ნათლად აჩვენებს, თუ რომელ მხარეს დგას დღევანდელი საქართველო — ევროპის ავტორიტარულ ნაწილში. საბჭოთა საქართველო რეალობა ხდება“, — თქვა მან.

ფეისბუკზე გამოქვეყნებული პოსტის გამო ჟურნალისტ ვახო სანაიას მოსამართლე ზვიად ცეკვავამ 14-დღიანი ადმინისტრაციული პატიმრობა მიუსაჯა.

ვახო სანაიას 14-დღიანი პატიმრობა მიუსაჯეს ფეისბუკზე დაწერილი პოსტის გამო