რუბიო იმედოვნებს, რომ შეიცვლება აშშ-სა და საქართველოს შორის არა მხოლოდ ურთიერთობის, არამედ თბილისის ქცევის „ტრაექტორიაც“

წარმომადგენელთა პალატის საგარეო საქმეთა კომიტეტში 3 ივნისს გამართული მოსმენის დროს რესპუბლიკელი კონგრესმენის ჯო უილსონის მიერ დასმული კითხვის საპასუხოდ, აშშ-ის სახელმწიფო მდივანმა მარკო რუბიომ იმედი გამოთქვა, რომ „შესაძლოა შეიცვალოს არა მხოლოდ [აშშ]-სა და საქართველოს შორის ურთიერთობის, არამედ მათი ქცევის ტრაექტორიაც“.

კონგრესმენმა უილსონმა რუბიოს ჰკითხა, თუ „რა უნდა გაკეთდეს საქართველოს რესპუბლიკაში „ქართული ოცნების“ მთავრობის მიერ წახალისებული სწრაფად მზარდი რადიკალიზაციის წინააღმდეგ“. სავარაუდოდ, „ქართული ოცნების“ ხელისუფლებაზე მითითებით, უილსონმა განაცხადა: „პროირანულმა რეჟიმმა – და ჩინეთის კომუნისტურმა პარტიამ მხარი დაუჭირა „ქართული ოცნების“ მთავრობას, რომელიც არალეგიტიმურია – საფრთხე შეუქმნა ამერიკის წვდომას. საქართველოში გაყალბდა არჩევნები. ამის გათვალისწინებით, ისინი ხელს უწყობენ ისლამური რევოლუციის გუშაგთა კორპუსს თეირანის წინააღმდეგ სანქციების თავის არიდებაში“.

უილსონის საპასუხოდ რუბიომ განაცხადა: „მართალი ხართ. ყველაფერი, რაც ახლა აღწერეთ, ჩვენ აქამდეც გვაშფოთებდა. მას შემდეგ მათ გარკვეული ნაბიჯები გადადგეს,  რაც იმაზე  მიანიშნებს, რომ მათ სურთ შეერთებულ შტატებთან ურთიერთობების გაუმჯობესება. ჩვენ ავუხსენით მათ, თუ რა იქნებოდა ამისთვის საჭირო; ჩვენ ვხედავთ გარკვეულ დადებით გამოხმაურებებს და ამიტომ იმედი გვაქვს, რომ საქართველოს შემთხვევაში ტრაექტორიის შეცვლას დავინახავთ დღევანდელი მდგომარეობიდან გამომდინარე“.

„მათ [თბილისმა] გვკითხეს, რა იქნება საჭირო შეერთებულ შტატებთან უკეთესი ურთიერთობისთვის, ჩვენ ვუპასუხეთ და იმედია, რომ ამის საფუძველზე შევძლებთ განვავითაროთ და შესაძლოა შევცვალოთ არა მხოლოდ ჩვენი ურთიერთობის, არამედ მათი ქცევის ტრაექტორია“.

ეს განცხადებები თბილის-ვაშინგტონის ურთიერთობებში გაურკვევლობის, ასევე კონტაქტების გაძლიერების ფონზე გაკეთდა, რადგან „ქართული ოცნების“ წარმომადგენლები კვლავ აცხადებენ „გადატვირთვის“ მზადყოფნას. ორმხრივ ურთიერთობებში ხანგრძლივი დაძაბულობის შემდეგ, ბოლო თვეებში ორი ქვეყნის ოფიციალურ პირებს შორის გაიზარდა ჩართულობა, მათ შორის მდივან რუბიოსა და „ქართული ოცნების“ პრემიერ-მინისტრ ირაკლი კობახიძეს შორის სატელეფონო საუბარი, ასევე აშშ-ის სახელმწიფო დეპარტამენტის წარმომადგენლების განმეორებითი ვიზიტები თბილისს.

მაისის ბოლოს მსგავსი ვიზიტის შემდეგ გავრცელებულ განცხადებაში აშშ-ის დელეგაციამ განაცხადა, რომ „ქართული ოცნების“ წარმომადგენლებთან შეხვედრის დროს მხარეებმა განიხილეს „ორმხრივი ურთიერთობების გაუმჯობესების გზა“, ხაზი გაუსვეს „სტაბილური შიდა პოლიტიკური კლიმატის“ აუცილებლობას, რომელიც ხელს შეუწყობს ოპოზიციის ჩართულობას და სხვა საკითხებთან ერთად, ორ ქვეყანას შორის მდგრადი სტრატეგიული პარტნიორობისთვის. ჯო ბაიდენის ადმინისტრაციის დროს შეერთებულმა შტატებმა 2024 წლის ნოემბერში, თბილისის საპროტესტო აქციების დროს, შეაჩერა სტრატეგიული პარტნიორობა ტრადიციულ მოკავშირე საქართველოსთან და იმავე წელს სანქციები დააწესა მმართველი პარტიის მილიარდერ დამფუძნებელს, ბიძინა ივანიშვილს. დონალდ ტრამპის ადმინისტრაციამ ჯერ კიდევ არ გააუქმა ეს გადაწყვეტილებები.

This post is also available in: