რუსეთი სოხუმში რეგულარულ ფრენებს 1 მაისიდან დაიწყებს

რუსეთი ოკუპირებულ აფხაზეთში რეგულარული ფრენების დაწყებას 1 მაისიდან გეგმავს, განაცხადა რუსეთის პრეზიდენტის ადმინისტრაციის უფროსის პირველმა მოადგილემ სერგეი კირიენკომ. განცხადება იმ ფონზე გაკეთდა, როდესაც რუსეთის საგანგებო სიტუაციების სამინისტროს სპეციალური რეისი 27 თებერვალს სოხუმის აეროპორტის მიმართულებით შესრულდება, რათა მძიმე ავადმყოფები, მათ შორის ბავშვები, რუსეთში სამკურნალოდ გადაიყვანონ.

„რადგან აეროპორტის ყველა სისტემის ფუნქციონირება პირველი სატესტო რეისით შემოწმდა, ახლა გვაქვს სრული დადასტურება და აბსოლუტური რწმენა, რომ რეგულარული საჰაერო მიმოსვლა ქალაქ სოხუმის აეროპორტში 1 მაისიდან შეიძლება დაიწყოს“, – განაცხადა კირიენკომ, რომელიც ახლახანს დაინიშნა მოსკოვის კურატორად ოკუპირებულ რეგიონში.

პირველი სატესტო ფრენა სოხუმის აეროპორტისკენ 7 თებერვალს განხორციელდა, როდესაც მოსკოვის ვნუკოვოს აეროპორტიდან სოხუმში რუსული სამგზავრო თვითმფრინავი დაეშვა. ეს პირველი თვითმფრინავი იყო, რომელიც პირველად დაეშვა აეროპორტში ბოლო 32 წლის განმავლობაში მას შემდეგ, რაც სამოქალაქო ავიაციის საერთაშორისო ორგანიზაციამ (ICAO) ის დახურა.

რუსეთის მხარდაჭერით სოხუმის აეროპორტის რეკონსტრუქცია სადავო საკითხი იყო. 2023 წლის ოქტომბერში აფხაზეთის დე ფაქტო ხელისუფლებასა და რუსულ კომპანია „ინფრასტრუქტურული განვითარებას“ შორის სოხუმის აეროპორტის „კომპლექსური რეკონსტრუქციის“ თაობაზე შეთანხმებას მოეწერა ხელი. თუმცა, პროექტის განხორციელებას ფინანსური დავები მოჰყვა. მოგვიანებით, ცნობილი გახდა, რომ სოხუმის აეროპორტის რეკონსტრუქციას კომპანია „ინფრასტრუქტურული განვითარება“ განახორციელებდა – ეს რაშიდ ნურგალიევის, რუსეთის შინაგან საქმეთა სამინისტროს ყოფილი უფროსის რაშიდ ნურგალიევის შვილის კომპანიაა.

როგორც საქართველოს სამოქალაქო ავიაციის სააგენტომ ადრე განაცხადა, სოხუმის აეროპორტში ვერც ერთი ავიაკომპანია ლეგიტიმურად საერთაშორისო საჰაერო მიმოსვლას ვერ განახორციელებს, სანამ ამის შესახებ სამოქალაქო ავიაციის საერთაშორისო ნორმების შესაბამისად გადაწყვეტილებას არ მიიღებს საქართველო. მიუხედავად ამისა, რუსეთის მაინც აპირებს რეგულარული ფრენების განხორციელებას, რითიც კიდევ უფრო გაამყარებს თავის ყოფნას ოკუპირებულ რეგიონში.

საჰაერო კავშირების დამყარების გარდა, რუსეთი აგრძელებს ძალისხმევას, რომ საქართველოს ტერიტორიული მთლიანობისა და სუვერენიტეტის შელახვის მიზნით, სარკინიგზო კავშირები განავითაროს ოკუპირებულ რეგიონთან. გავრცელებული ინფორმაციით, 27 თებერვალს ელექტრომატარებელმა „ლასტოჩკამ“ რუსეთის ქალაქ სოჭიდან ოკუპირებულ სოხუმში სატესტო მგზავრობა „წარმატებით დაასრულა“. „ლასტოჩკა“ სოჭი-გაგრას მარშრუტზე 2023 წლის 8 ივნისიდან ფუნქციონირებს, ხოლო სოხუმის დაფარვა რეგიონში რუსეთის გავლენის გაძლიერების საგანგაშო ტენდენციას წარმოადგენს. გავრცელებული ინფორმაციით, მატარებლების რეგულარული მოძრაობა 1 მაისს დაიწყება.

ასევე წაიკითხეთ:

• 18/09/2023 – სოხუმი საერთაშორისო აეროპორტის გახსნას 2025 წელს გეგმავს
• 02/08/2023 – სახელმწიფო დეპარტამენტი: „აშშ სოხუმის აეროპორტს საქართველოს საჰაერო სივრცის ნაწილად განიხილავს“

This post is also available in: English (ინგლისური)