„რუსთავი 2“-მა მეორე კვარტალში სატელევიზიო რეკლამიდან მიღებული შემოსავლებით „იმედს“ გაუსწრო

კომუნიკაციების კომისიის (ComCom) ოფიციალური მონაცემების თანახმად, რომლებიც დამოუკიდებელმა მედია პლატფორმა „მედია ჩეკერმა“ მიმოიხილა, სახელისუფლებო ტელეკომპანია „რუსთავი 2“-მა 2026 წლის მეორე კვარტალში ქართულ ტელეარხებს შორის კომერციული რეკლამიდან ყველაზე მაღალი შემოსავალი მიიღო, რითიც ტელეკომპანია „იმედს“ გაასწრო.

ამავე მონაცემების თანახმად, ტელევიზიების მიერ მიღებული კომერციული სარეკლამო შემოსავლების 74% სამთავრობო ტელეკომპანიებზე,  „რუსთავი 2“-სა და „იმედზე“ მოდის. მონაცემებში არ შედის ოპოზიციურად განწყობილი ტელეკომპანია „ფორმულას“ კომერციული შემოსავალი. ტელეკომპანიის იურისტის თქმით, ტექნიკური მიზეზების გამო, არხი ComCom-ს ამ მონაცემებს „უახლოეს მომავალში წარუდგენს“.

„რუსთავი 2“-მა მეორე კვარტალში 9.75 მილიონი ლარის სარეკლამო შემოსავალი მიიღო, შემდეგ მოდის „იმედი“ 8.06 მილიონი ლარით. „იმედმა“ 2021 წლიდან 2025 წლამდე ყოველ წელს ყველაზე მაღალი კომერციული სარეკლამო შემოსავალი მიიღო საქართველოს ტელევიზიებს შორის. ის ასევე ლიდერობდა 2026 წლის პირველ კვარტალში, 10.81 მილიონი ლარით, „რუსთავი 2“-ს კი 7.94 მილიონი ლარის შემოსავალი ჰქონდა.

კიდევ ერთმა ხელისუფლებისადმი კრიტიკულად განწყობილმა ტელეკომპანია „პირველმა“ მეორე კვარტალში 1.38 მილიონი ლარის კომერციული სარეკლამო შემოსავალი მიიღო, ხოლო POSTV-მ – 1.18 მილიონი ლარი მიიღო. „ქართული ოცნების“ დამფუძნებლის, ბიძინა ივანიშვილის ვაჟის, ბერა ივანიშვილის მიერ დაარსებულმა GDS-მა 670 000 ლარი, ხოლო სახელისუფლებო „მაესტრო TV“-მ 220 000 ლარი მიიღო.

This post is also available in: