საგარეო საქმეთა სამინისტრო: 1.5 მილიონზე მეტი ქართველი საზღვარგარეთ ცხოვრობს

1.5 მილიონზე მეტი საქართველოს მოქალაქე საზღვარგარეთ ცხოვრობს, განაცხადა საგარეო საქმეთა მინისტრის მოადგილემ ვლადიმერ კონსტანტინიდმა 7 მარტს „ქართული ოცნების“ პარლამენტის დიასპორისა და კავკასიის საკითხთა კომიტეტის სხდომაზე. ოფიციალური სტატისტიკური მონაცემებით, 2024 წლის 1 იანვრის მდგომარეობით, საქართველოს მოსახლეობა 3.7 მილიონს შეადგენდა.

კონსტანტინიდის თქმით, ეს მაჩვენებელი არაოფიციალურია. მან ასევე განაცხადა, რომ ბევრი ქართველი არალეგალურად ცხოვრობს უცხო ქვეყნებში, ამიტომ სტატისტიკური მონაცემები შესაძლოა ზუსტი არ იყოს. მისი თქმით, სამინისტროს ინფორმაცია ეფუძნება საელჩოებიდან და დიასპორიდან მიღებულ მონაცემებს და, შესაბამისად, შეიძლება არაზუსტი იყოს.

მან ასევე წარმოადგინა იმ ქვეყნების სია, სადაც ყველაზე მეტი ქართველი ცხოვრობს:

• რუსეთი – 700 000
• საბერძნეთი – 200 000
• აშშ – 120 000
• იტალია – 50 000
• გერმანია – 50 000
• თურქეთი – 45 000
• საფრანგეთი – 35 000
• ესპანეთი – 25 000
• ბელგია – 20 000
• ისრაელი – 20 000
• გაერთიანებული სამეფო – 10 000

თუმცა, კონსტანტინიდის მიერ მოყვანილი რიცხვები რუსეთში მცხოვრები ქართველების შესახებ ბევრად აღემატება რუსეთის ოფიციალურ სტატისტიკას: 2020 წელს რუსეთში ჩატარებული საყოველთაო აღწერის მიხედვით, 113 687 პირი იდენტიფიცირებული იყო როგორც ეთნიკური ქართველი და რუსეთში მცხოვრები, აქედან, 3 045 საქართველოს მოქალაქე იყო. იმის გათვალისწინებით, რომ უკრაინაში რუსეთის შეჭრის შემდეგ ბევრი ეთნიკური ქართველი რუსეთიდან საქართველოში დაბრუნდა, ეს მაჩვენებელი სავარაუდოდ კიდევ უფრო დაბალია.

დიასპორის საკითხი 26 ოქტომბრის საპარლამენტო არჩევნების ერთ-ერთი მთავარი თემა იყო. კენჭისყრამდე რამდენიმე თვით ადრე, ოპოზიციურმა პარტიებმა და პრეზიდენტმა სალომე ზურაბიშვილმა არაერთხელ მოუწოდეს ცენტრალურ საარჩევნო კომისიას (ცესკო) მეტი საარჩევნო უბანი გაეხსნა საზღვარგარეთ, რათა ემიგრანტებს არჩევნებში მონაწილეობის შესაძლებლობა ჰქონოდათ. ეს მოწოდებები უპასუხოდ დარჩა.

ცესკომ მხოლოდ 60 საარჩევნო უბანი გახსნა 42 ქვეყანაში, რის გამოც ქართველებს ზოგიერთ დიდ ქალაქში, მათ შორის ბერლინსა და ნიუ-იორკში ხმის მისაცემად საათობით უწევდათ გრძელ რიგებში დგომა ბევრმა საერთოდ ვერ შეძლო ხმის მიცემა.

ემიგრანტთა აბსოლუტურმა უმრავლესობამ, რომლებმაც ხმის მიცემა მოახერხეს, ოპოზიციურ პარტიებს დაუჭირეს მხარი. ცესკოს ოფიციალურმა შედეგებმა აჩვენა, რომ „ქართულმა ოცნებამ“ ემიგრანტების ხმების მხოლოდ 13.5% დააგროვა, რამაც ოპოზიციას საზღვარგარეთ გამარჯვება მოუტანა. მაგრამ აქტივობა შეიძლებოდა უფრო მაღალიც ყოფილიყო, საარჩევნო უბნები მათ ქალაქებთან უფრო ახლოს რომ ყოფილიყო.

არჩევნების შემდეგ პრეზიდენტმა სალომე ზურაბიშვილმა საკონსტიტუციო სასამართლოს სარჩელით მიმართა ხმის მიცემის ფარულობისა და არჩევნების საყოველთაობის დარღვევის გამო. ეს უკანასკნელი იმ ფაქტს ეხებოდა, რომ სახელმწიფომ ვერ შეუწყო ხელი ემიგრანტების მიერ ხმის მიცემის უფლების გამოყენებას. საკონსტიტუციო სასამართლომ საჩივარი არ დააკმაყოფილა.

ასევე წაიკითხეთ:

• 30/09/2024 – სასამართლომ არ დააკმაყოფილა სარჩელები საზღვარგარეთ შეზღუდული რაოდენობის საარჩევნო უბნების გახსნაზე ცესკოს გადაწყვეტილების წინააღმდეგ
• 27/05/2024 – პრეზიდენტი ოქტომბრის არჩევნებზე დიასპორას „სრული მობილიზაციისკენ“ მოუწოდებს
• 29/03/2024 – ემიგრანტების მიერ ხმის მიცემის გამარტივებაზე უარის გამო პრეზიდენტი საგარეო საქმეთა სამინისტროს აკრიტიკებს  
• 17/01/2024 – ცესკო-ს 2024 წლის სამოქმედო გეგმას ემიგრანტების ხმების იგნორირების გამო აკრიტიკებენ

This post is also available in: English (ინგლისური)