საგარეო უწყება: დაკავებული Eagle S-ის ეკიპაჟს ბორტის დატოვება გამოძიების დასრულებამდე ეკრძალება

საგარეო საქმეთა სამინისტროში რადიო თავისუფლებას განუცხადეს, რომ ფინეთის ხელისუფლების მიერ დაკავებული ტანკერის ეკიპაჟის წევრებს ბორტის დატოვება გამოძიების დასრულებამდე ეკრძალებათ. ლაპარაკია საქართველოს მოქალაქეებზე, რომლებიც დაკავებული ტანკერის - Eagle S-ის ბორტზე იმყოფებიან. ფინეთის პრესის თანახმად, გემის კაპიტანია დავით ვადაჭკორია, ხოლო ეკიპაჟში, ქართველებთან ერთად, ინდოეთის მოქალაქეები არიან. სხვადასხვა წყაროს ცნობით, გამოძიება შესაძლოა თვეების განმავლობაში გაგრძელდეს.

“საქართველოს საელჩო კონტაქტზეა ფინეთის სამართალდამცავ უწყებებთან, ასევე ეკიპაჟის წევრებთან აქვთ ყოველდღიური კონტაქტი. საკითხზე მიმდინარეობს გამოძიება და ეკიპაჟის წევრებს, გამოძიების დასრულებამდე აკრძალული აქვთ გემის დატოვება”, - საგარეო უწყება ასევე განმარტავს, რომ კომუნიკაცია საკონსულოს ხაზით დაიწყო და საგამოძიებო პროცესში არ არიან ჩართული, რადგან ეს მათი კომპეტენცია არ არის. განცხადებაში არ არის დაკონკრეტებული, თუ საქართველოს რამდენი მოქალაქე იმყოფება Eagle S-ის ბორტზე.

კუკის კუნძულების დროშით მცურავი ტანკერი - Eagle S - ფინეთის ხელისუფლებამ გასული წლის დეკემბერში დააკავა და გამოძიება სისხლის სამართლის წესით მიმდინარეობს. ტანკეტს ბრალად ედება ფინეთისა და ესტონეთის დამაკავშირებელი ელექტროკაბელის - EstLink 2-ისა და ოთხი საკომუნიკაციო კაბელის დაზიანება, ბალტიის ზღვის ფსკერზე. ოთხი საკომუნიკაციო კაბელიდან სამი ესტონეთსა და ფინეთს აკავშირებდა, ხოლო კიდევ ერთი - ფინეთსა და გერმანიას. ფინეთის ეროვნული საგამოძიებო ბიურო ვარაუდობს, რომ ხომალდი ფსკერზე განზრახ მიათრევდა ღუზას ათეულობით კილომეტრის მანძილზე, რათა განზრახ დაეზიანებინა კაბელები.

ევროკავშირი მიიჩნევს, რომ Eagle S რუსეთის ჩრდილოვანი ფლოტის ნაწილია და ამ საკითხთან დაკავშირებით საგანგებო ზომები, მათ შორის - დამატებით სანქციები განიხილება. ერთ-ერთი ვერსიით, ტანკერი Eagle S, რომლის ოპერატორადაც ოფიციალურად - არაბთა გაერთიანებული საამიროების კომპანია Caravella LLC-FZ სახელდება, გამოიყენებოდა რუსული ნავთობის ტრანსპორტირებისთვის საერთაშორისო სანქციების გვერდის ავლით.

ადგილობრივი მედიის ინფორმაციით, 3 იანვარს, უშედეგოდ დასრულდა სასამართლო პროცესი ჰელსინკის რეგიონულ სასამართლოში, სადაც ადვოკატი ტანკერის გათავისუფლებას ითხოვდა. დაცვის მხარე კვლავ გეგმავს ამ საკითხის დაყენებას. პარალელურად, გამოძიების ფარგლებში ლაპარაკია ტანკერის შესაძლო კონფისკაციაზე.