4 weeks ago
3
პოლონური გაზეთი Gazeta Prawna იტყობინება, რომ პოლონელი მესაზღვრეების წარმომადგენლის ანდრეი იუზვიაკის განცხადებით, პოლონეთიდან 17 ქართველის დეპორტაცია განხორციელდა. მისი თქმით, დეპორტირებულ ქართველებს „კრიმინალური წარსული“ ჰქონდათ ან პოლონეთში ლეგალური ბინადრობის ნებართვის გარეშე იმყოფებოდნენ.
იუზვიაკმა ასევე აღნიშნა, რომ დეპორტირებულები ძირითადად 24-დან 58 წლამდე ასაკის მამაკაცები არიან, რომელთა სადეპორტაციოდ ტრანსპორტირებაც პოლონეთის სხვადასხვა კუთხიდან მოხდა.
„დეპორტაციები დაიწყო, ეფექტურად ვშლით ქართულ დაჯგუფებებს, არა სიტყვებით, არამედ ქმედებებით“, – დაწერა პოლონეთის პრემიერ-მინისტრმა დონალდ ტუსკმა X-ის საკუთარ გვერდზე. მან ასევე გაავრცელა ვიდეო კადრები, სადაც ჩანს, როგორ მიაცილებენ მესაზღვრეები ქართველებს თვითმფრინავში.
ვარშავის დანაშაულის სტატისტიკა, როგორც TVP World-მა 2024 წელს გამოავლინა, იმაზე მიუთითებს, რომ პოლიციამ 1895 საქართველოს მოქალაქე დააკავა, რომლებიც, სავარაუდოდ, კრიმინალურ საქმიანობაში იყვნენ ჩართულნი. 532 დანაშაული მხოლოდ დედაქალაქ ვარშავაში მოხდა.
TVP World-ის ინფორმაციით, პოლონეთის შინაგან საქმეთა სამინისტროს და ადმინისტრაციის ოფიციალური მონაცემებით ირკვევა, რომ „პოლონეთმა გასულ წელს 2 589 ქართველის დეპორტაცია მოახდინა, ძირითადად ყალბი დოკუმენტების გამოყენების გამო“. ამჟამად დაკავებულია საქართველოს 322 მოქალაქე, ხელისუფლება კი ქართველი ეჭვმიტანილების მონაწილეობით განმეორებითი დანაშაულების ჩადენის შესახებ იტყობინება.
„ხელისუფლება აცხადებს, რომ ქართველი ეჭვმიტანილების მონაწილეობით დანაშაულები რეგულარულად ხდება, მათ შორის ყველაზე გავრცელებული დანაშაულებია ძარცვა, ნარკოტიკებითა და იარაღით ვაჭრობა და გამოძალვა“, – წერს პოლონური მედია.
მსგავსი ქმედებები მანამდე ირლანდიამაც განახორციელა და 27 თებერვალს ჩარტერული რეისით საქართველოს 32 მოქალაქე სამშობლოში დააბრუნა.
ასევე წაიკითხეთ:
- 23/10/2023 – 2023 წლის მესამე კვარტალში ევროპიდან 1000-ზე მეტი საქართველოს მოქალაქეა დეპორტირებული
- 17/10/2006 – რუსეთიდან 150 ქართველი იქნა დეპორტირებული
This post is also available in: English (ინგლისური) Русский (რუსული)
English (US) · 
Georgian (GE) ·