საია თავდაცვის სამინისტროდან თანამშრომლების გათავისუფლებას აკრიტიკებს

საქართველოს ახალგაზრდა იურისტთა ასოციაციამ (საია) განაცხადა, რომ თავდაცვის სამინისტროდან 150 თანამშრომელი დაითხოვეს „საგანგაშო“ რეორგანიზაციის პროცესის ფარგლებში. 16 მარტის განცხადებაში საია ამბობს, რომ გათავისუფლებულთა უმეტესობა თვლის, რომ ისინი პოლიტიკური მიზეზების, კერძოდ კი 2024 წლის ნოემბრის ბოლოს პროევროპული პეტიციის ხელმოწერის გამო დაითხოვეს.  

საიას განცხადებით, სამსახურიდან გათავისუფლების საქმეების განხილვის შედეგად დადგინდა, რომ რეორგანიზაციის პროცესი თანამშრომლების წინასწარი ინფორმირების გარეშე დაიწყო. ზოგიერთი სტრუქტურული ერთეული საერთოდ გაუქმდა და მათი თანამშრომლები გაათავისუფლეს, ზოგი კი სხვა თანამდებობებზე გადაიყვანეს. ასევე უცნობია კრიტერიუმები და შეფასებები, რომელთა საფუძველზეც დაითხოვეს თანამშრომლები.

„ამგვარად თანამშრომელთა გათავისუფლება, არსებული სასამართლო პრაქტიკის გათვალისწინებით, გათავისუფლების უკანონოდ მიჩნევის საფუძველია“, – აცხადებს საია და დასძენს, რომ თანამშრომელთას გათავისუფლება „წარმოადგენს პოლიტიკური ნიშნით რეპრესიას საჯარო მოხელეების მიმართ. პროცესი ხორციელდება უსამართლოდ, გაუმჭვირვალედ და სასამართლო პრაქტიკის იგნორირებით“.

საიამ განსაკუთრებული შეშფოთება გამოხატა თავდაცვის მინისტრის №582 ბრძანებაში 24 იანვარს შეტანილი ცვლილების გამო, რომლის მიხედვითაც განისაზღვრა სპეციალური წოდების მქონე მოსამსახურეთა ზღვრული ასაკი. „ცვლილების მიხედვით, შესაბამისი წოდებისთვის დადგენილ ზღვრულ ასაკს მიღწევა წარმოადგენს სამსახურიდან გათავისუფლების საფუძველს. რეორგანიზაციის გარდა, სწორედ ამ ცვლილების საფუძველზეც არაერთი პირი გათავისუფლდა უწყებიდან“, – აცხადებს ორგანიზაცია.

საია-ს თქმით, იმის გათვალისწინებით, რომ ზღვრული ასაკის დაწესება ფუნდამენტური მნიშვნელობის საკითხია, მისი რეგულირება კანონქვემდებარე ნორმატიული აქტით, დაუშვებელია. „ზღვრული ასაკის განსაზღვრა უნდა მოხდეს მხოლოდ კანონით. შესაბამისად, თავდაცვის მინისტრის ბრძანებით ამ საკითხის დარეგულირება და ცვლილებების შეტანა ეწინააღმდეგება საქართველოს კონსტიტუციის 25-ე მუხლის პირველ პუნქტს“.

„საია მოუწოდებს ადმინისტრაციულ ორგანოებს, დაუყოვნებლივ შეწყვიტონ საჯარო სამსახურებში დასაქმებული პირების უკანონო გათავისუფლება და უზრუნველყონ საჯარო მოხელეთა უფლებების დაცვა“, – აცხადებს ორგანიზაცია.

2024 წლის დეკემბრის ბოლოს „ქართული ოცნების“ არჩეულმა პრეზიდენტმა მიხეილ ყაველაშვილმა „საჯარო სამსახურის შესახებ“ კანონში რიგი ცვლილებები დაამტკიცა, რაც ამარტივებს საჯარო სექტორის რეორგანიზაციას.

თავდაცვის სამინისტროდან გათავისუფლებულმა რამდენიმე თანამშრომელმა თანამდებობიდან გათავისუფლება საჯაროდ დაადასტურა. მათმა უმრავლესობამ განაცხადა, რომ სამინისტრომ მათი დათხოვნის მიზეზად რეორგანიზაცია დაასახელა.

ადგილობრივმა უფლებადამცველმა ორგანიზაციებმა, მათ შორის სოციალური სამართლიანობის ცენტრმა, გააკრიტიკეს „ქართული ოცნების“ ხელისუფლება და ცვლილებებს რეპრესიული უწოდეს. „საერთაშორისო გამჭვირვალობა-საქართველოს“ აღმასრულებელმა დირექტორმა ეკა გიგაურმა 27 თებერვალს განაცხადა, რომ საჯარო სამსახურის შესახებ კანონში ცვლილებებისა და პროევროპული აქციების დაწყების შემდეგ, 400-მდე საჯარო მოხელე დაითხოვეს სახელმწიფო სტრუქტურებიდან. მას შემდეგ გათავისუფლების რაოდენობა კიდევ უფრო გაიზარდა.

ასევე წაიკითხეთ:

• 29/11/2024 – თავდაცვის სამინისტროს თანამშრომლები „ქართული ოცნების“ გადაწყვეტილებას ემიჯნებიან
• 02/12/2024 – კობახიძე საკადრო წმენდაზე საუბრობს და აცხადებს, რომ საჯარო სამსახური „თვითწმენდის რეჟიმზეა გადასული“

This post is also available in: English (ინგლისური)