„სამართლიანი არჩევნები“: საჯარო რეესტრიდან თანამშრომელთა გათავისუფლების  პროცესი „სრულიად დაუსაბუთებლად“ და „დისკრიმინაციულად“ წარიმართა

სამართლიანი არჩევნებისა და დემოკრატიის საერთაშორისო საზოგადოებამ (ISFED), რომელიც სასამართლოში გათავისუფლებული საჯარო მოხელეების ინტერესებს იცავს, განაცხადა, რომ საჯარო რეესტრის ეროვნული სააგენტოდან 43 თანამშრომლის გათავისუფლების პროცესი „არ ემსახურებოდა რეალურ საჭიროებებს და პროცესი სრულიად დაუსაბუთებლად და დისკრიმინაციულად წარიმართა“.  

ორგანიზაცია გათავისუფლებებს პოლიტიკურად მოტივირებულად მიიჩნევს და ამას იმით ხსნის, რომ „საჯარო რეესტრი მუდმივად განიცდის კადრების დეფიციტს, რაც დასტურდება საჯარო სამსახურის ბიუროს ვებგვერდზე გამოქვეყნებული არაერთი ვაკანსიით“. ორგანიზაციის თქმით, გათავისუფლებულთა ნაწილი წლებია მუშაობს სააგენტოში, რაც „ცხადყოფს, რომ თანამშრომელთა ნაწილთან დადებული ხელშეკრულებები საქართველოს კანონმდებლობის მიხედვით უვადო შრომით ხელშეკრულებას მიეკუთვნება“. 12 მარტს გამოქვეყნებულ განცხადებაში „სამართლიანი არჩევნები“ აცხადებს, რომ საჯარო რეესტრმა არ მიაწოდა მოთხოვნილი ინფორმაცია დათხოვილი თანამშრომლების შესახებ.

ორგანიზაციის თქმით, საჯარო რეესტრის თანამშრომლებს ნოემბრის დასაწყისში – საპროტესტო აქციების დაწყებამდე – უთხრეს, რომ მიწის სისტემური რეგისტრაციის პროექტი, რომელიც 2024 წლის 31 დეკემბერს უნდა დასრულებულიყო გაგრძელდა 2025 წლის 31 დეკემბრის ჩათვლით. ამავდროულად, „ნოემბრის თვეში თანამშრომლებს დაეგზავნათ შეტყობინებები, რომ არსებული ადამიანური რესურსი 2025 წელსაც შენარჩუნდებოდა“. ამასთანავე, 2024 წლის სექტემბერ-ოქტომბერში საჯარო რეესტრის ეროვნულმა სააგენტომ  45 პოზიციაზე გამოაცხადა ვაკანსია. „სამართლიანი არჩევნები“ მიიჩნევს, რომ ეს ფაქტორები ეჭვქვეშ აყენებს სამსახურიდან გათავისუფლების დასაბუთებულობას.

გათავისუფლებული თანამშრომლები მიიჩნევენ, რომ მიმდინარე პროცესი პირდაპირ კავშირშია 2024 წლის 30 ნოემბერს გავრცელებულ პეტიციასთან, რომელსაც სააგენტოს 350-ზე მეტმა თანამშრომელმა მოაწერა ხელი. თანამშრომლებმა საჯაროდ გამოხატეს თავიანთი პოზიცია „ქართული ოცნების“ გადაწყვეტილებასთან დაკავშირებით, შეაჩეროს ევროკავშირში გაწევრიანების პროცესი, და დაგმეს ძალადობა.

„სამართლიანმა არჩევნებმა“ განაცხადა, რომ საქალაქო სასამართლოებში საჯარო რეესტრის ეროვნული სააგენტოდან გათავისუფლებული 43 ადამიანის უფლებების დასაცავად სარჩელი შეიტანა.

საჯარო მოხელეების სამსახურიდან გათავისუფლება, მათ შორის „რეორგანიზაციის“ საბაბით, დეკემბრის ბოლოს, „საჯარო სამსახურის შესახებ“ კანონში ცვლილებების მიღებით დაიწყო. „სამართლიანი არჩევნები“ მიიჩნევს, რომ ცვლილებებით, რომლებიც პოლიტიკური ნიშნით დათხოვნის გამარტივების საშუალებად განიხილება, გაუარესდა არსებული საკანონმდებლო მოწესრიგება და დაირღვა საჯარო მოსამსახურეთა შრომითი უფლებები, რაც არსებითად ეწინააღმდეგება საქართველოს კონსტიტუციისა და „საჯარო სამსახურის შესახებ“ საქართველოს კანონის სულისკვეთებას.

ასევე წაიკითხეთ:

• 11/03/2025 – სავარაუდოდ პოლიტიკური მოტივით თსუ-ს ორი ლექტორი დაითხოვეს
• 06/03/2025 – ტელეკომპანია „იმედის“ ინფორმაცია პროტესტის გამო საჯარო მოხელის გათავისუფლების ნორმალიზებას ახდენს
• 28/02/2025 – თავდაცვის სამინისტროდან დათხოვნები პოლიტიკურად მოტივირებული წმენდის თაობაზე შეშფოთებას იწვევს
• 12/12/2024 – საია ახალ საკანონმდებლო ცვლილებებს აკრიტიკებს და დემოკრატიის უკუსვლის შესახებ აფრთხილებს
• 02/12/2024 – კობახიძე საკადრო წმენდაზე საუბრობს და აცხადებს, რომ საჯარო სამსახური „თვითწმენდის რეჟიმზეა გადასული“

This post is also available in: English (ინგლისური)