2 weeks ago
6
სამხრეთ კორეის მმართველი პარტიის "ხალხის ძალის" ლიდერმა, ხან დონ ჰუნმა თანამდებობიდან გადადგომისკენ მოუწოდა ქვეყნის პრეზიდენტ იუნ სოკ იოლის. ამით მმართველმა პარტიამ თავისი ხმა შეუერთა ოპოზიციის ანალოგიურ მოწოდებას.
სააგენტო KBS-ის ცნობით, 6 დეკემბერს გამართულ პარტიის ხელმძღვანელობის ვადამდელ შეკრებაზე, ხანმა აღნიშნა, რომ პრეზიდენტი შესაძლოა კვლავ წავიდეს რადიკალურ ზომებზე, თუ თანამდებობაზე დარჩება.
მანამდე ოპოზიციურმა დემოკრატიულმა პარტიამ პარლამენტში შეიტანა კანონპროექტი პრეზიდენტის იმპიჩმენტის თაობაზე. დეპუტატების წინაშე გამოსვლის დროს, პარტიის თავმჯდომარემ, ლი ჯემიონმა განაცხადა, რომ პრეზიდენტი გადატრიალებას გეგმავდა.
როგორც კორეული გაზეთი "ჩოსონ ილბო" იუწყება, პრეზიდენტის იმპიჩმენტის საკითხს პარლამენტი 7 დეკემბრის საღამოს განიხილავს.
სამხრეთ კორეის პრეზიდენტმა იუნ სოკ იოლმა 3 დეკემბერს, საღამოს, მოულოდნელად გამოაცხადა, რომ ქვეყანაში საომარი მდგომარეობის რეჟიმს აწესებს, თუმცა მას შემდეგ, რაც პარლამენტმა მხარი არ დაუჭირა, უკან დაიხია. 4 დეკემბერს მთავრობა იძულებული გახდა, საომარი მდგომარეობა გაეუქმებინა და სამხედროები თავიანთ ნაწილებში დაებრუნებინა.
საომარი მდგომარეობა ითვალისწინებდა პარლამენტის მუშაობისა და პოლიტიკური პარტიების აკრძალვას.
English (US) · 
Georgian (GE) ·