საქართველომ ტერორიზმის მხარდაჭერის გამო ძებნილი აშშ-სა და უზბეკეთის მოქალაქე აშშ-ს გადასცა

აშშ-ის საელჩომ საქართველოში 25 სექტემბერს განაცხადა, რომ საქართველოში დააკავეს და აშშ-ს გადასცეს აშშ-სა და უზბეკეთის მოქალაქე, რომელსაც ამერიკული ხელისუფლება „ათი წლის განმავლობაში“ ეძებდა. მას „ისლამური სახელმწიფოსა“ და „ალ-ნუსრას ფრონტის“ მატერიალური მხარდაჭერა ედება ბრალად.

„უზბეკეთის მოქალაქე დავუდ ანსარი, რომელიც აშშ-ის ნატურალიზებული მოქალაქეა, თბილისში მას შემდეგ დააკავეს, რაც ათი წლის განმავლობაში იმალებოდა; იგი აშშ-ს გადაეცა, რათა პასუხი აგოს ბრალდებებზე, რომლებიც ISIS-ისა და „ალ-ნუსრას ფრონტის“ მატერიალურ მხარდაჭერას უკავშირდება“, — დაწერა საელჩომ X-ზე და დასძინა, რომ „ტერორიზმის მხარდამჭერ ქსელებთან ბრძოლა ამერიკის უსაფრთხოების უზრუნველყოფას უწყობს ხელს“.  

საელჩომ მადლობა გადაუხადა საქართველოს ხელისუფლებას ანსარის დაკავებასა და ექსტრადიციაში გაწეული დახმარებისთვის.

ბრალის დამტკიცების შემთხვევაში ანსარის 35 წლამდე პატიმრობა ემუქრება.

This post is also available in: