საქსტატი: 2026 წლის I კვარტალში პირდაპირი უცხოური ინვესტიციების მოცულობამ 271.2 მლნ. აშშ დოლარი შეადგინა

საქართველოს სტატისტიკის ეროვნული სამსახურის (საქსტატი) მიერ 9 ივნისს გამოქვეყნებული წინასწარი მონაცემებით, 2026 წლის I კვარტალში პირდაპირი უცხოური ინვესტიციები წინა წლის ანალოგიური პერიოდის წინასწარ მონაცემებთან შედარებით 47.7%-ით გაიზარდა და 271.2 მლნ აშშ დოლარი შეადგინა.

„საქსტატი“ აღნიშნავს, რომ ზრდა განპირობებულია სააქციო კაპიტალის და სავალო ვალდებულებების მაჩვენებლის გაზრდით.

2026 წლის I კვარტალში სააქციო კაპიტალმა 101.6 მლნ. აშშ დოლარი შეადგინა, რაც მთლიანი პირდაპირი უცხოური ინვესტიციების 37.5%-ია. რეინვესტიციამ 145.8 მლნ. აშშ დოლარი შეადგინა და მისი  წილი 53.8%-ით განისაზღვრა, ხოლო სავალო ვალდებულებებმა 23.8 მლნ. აშშ დოლარი შეადგინა. ის პირდაპირი უცხოური ინვესტიციების 8.8%-ია.

ქვეყანაში განხორციელებული ინვესტიციების კუთხით სიის სათავეშია გაერთიანებული სამეფოა 52.4 მლნ აშშ დოლარით, რაც მთლიანი პირდაპირი უცხოური ინვესტიციების 19.3%-ს შეადგენს; შემდეგ მოდიან აშშ – 47.5 მლნ. აშშ დოლარით (17.5%) და ნიდერლანდები – 29.2 მლნ. აშშ დოლარით (10.8%). მეოთხე ადგილზე აზერბაიჯანია 20.9 მლნ აშშ დოლარით (7.7%), რომელსაც მარშალის კუნძულები მოყვება 19.8 მლნ აშშ დოლარით (7.3%).

ყველაზე მეტი პირდაპირი უცხოური ინვესტიცია საფინანსო და სადაზღვევო საქმიანობების სექტორში  განხორციელდა და 125.1 მლნ. აშშ დოლარი შეადგინა, რაც მთლიანი პირდაპირი უცხოური ინვესტიციების 46.1%-ია. მეორე ადგილს იკავებს უძრავი ქონების სექტორი – 48.8 მლნ. აშშ დოლარით (18%), ხოლო მესამეზე იმყოფება ინფორმაციისა და კომუნიკაციის სექტორი 37.2 მლნ. აშშ დოლარით (13.7%). სამი უმსხვილესი სექტორის წილმა 77.8% შეადგინა.

This post is also available in: