საჯარო რეესტრი საჯარო მოხელეთა პროფკავშირის რეგისტრაციას ბლოკავს

საჯარო რეესტრის ეროვნულმა სააგენტომ არაერთხელ დაბლოკა პოლიტიკური მიზეზით საჯარო სამსახურიდან გათავისუფლებულ პირთა უფლებების დაცვის მიზნით შექმნილი „საჯარო მოსამსახურეთა დამოუკიდებელი პროფკავშირის – კონსტიტუციის 78-ე მუხლის“ რეგისტრაცია.

„საერთაშორისო გამჭვირვალობა-საქართველო“, რომელიც იურიდიულ დახმარებას უწევს გათავისუფლებულ საჯარო მოხელეებს, აცხადებს, რომ საჯარო რეესტრის გადაწყვეტილებები, ხელი შეუშალოს პროფკავშირის „ეფექტურ ფუნქციონირებას“, პოლიტიკურად მოტივირებულია. ორგანიზაციის აღმასრულებელმა დირექტორმა ეკა გიგაურმა 27 თებერვალს გამართულ ბრიფინგზე განაცხადა, რომ „ქართული ოცნების“ ხელისუფლებას დამოუკიდებელი საჯარო მოხელეთა კავშირის ეშინია. მისი თქმით, ასეთი გაერთიანება ეწინააღმდეგება მმართველი პარტიის მიზანს, შექმნას ხელისუფლების მორჩილი საჯარო სამსახური.

საჯარო მოხელეთა პროფკავშირი გასული წლის დეკემბერში შეიქმნა მას შემდეგ, რაც „ქართულმა ოცნებამ“ ევროკავშირში ინტეგრაციის პროცესის შეჩერებისა და პროევროპული პროტესტის მხარდამჭერი საჯარო მოხელეების წმენდის გადაწყვეტილება მიიღო. საჯარო რეესტრმა არაერთხელ უთხრა პროფკავშირს რეგისტრაციაზე უარი, მიუხედავად იმისა, რომ საჭირო დოკუმენტაცია წარდგენილი იყო. გიგაურის თქმით,  თებერვალში წარდგენილ განაცხადში, საჯარო რეესტრმა პროფკავშირს იმ მოტივით უთხრა უარი, რომ მისი სახელი არ მოეწონა.

გიგაურმა განაცხადა, რომ საჯარო რეესტრი თვითნებურად იქნევა და ეწინააღმდეგება არა მხოლოდ საქართველოს კონსტიტუციას და კანონმდებლობას, არამედ საქართველოს საერთაშორისო ვალდებულებებს. მას მხედველობაში ჰქონდა შშრომის საერთაშორისო ორგანიზაციის სამი სხვადასხვა კონვენცია. გიგაურმა განაცხადა, რომ ამის გამო პროფკავშირმა 26 თებერვალს შრომის საერთაშორისო ორგანიზაციას მიმართა.

გიგაურის თქმით, ბოლო თვეების განმავლობაში 400-მდე საჯარო მოხელე გაათავისუფლეს. წმენდა განსაკუთრებით შეეხო საჯარო რეესტრს, პრობაციის სააგენტოს და იუსტიციის სახლს. რეორგანიზაცია, რომელსაც ხშირად პოლიტიკური დათხოვნის საბაბად იყენებენ, ცოტა ხნის წინ თავდაცვის სამინისტროშიც დაიწყო.

„საჯარო მოხელეების სამსახურიდან გათავისუფლების მთავარი მიზეზი არის ის, რომ ისინი იცავენ საქართველოს კონსტიტუციას და აკეთებენ ყველაფერს, რომ გაემიჯნონ იმ უკანონობას, რაც ქვეყანაში მიმდინარეობს. ისინი [საჯარო მოხელეები] დღეს ზუსტად ჩვენი ქვეყნის სიყვარულის გამო ისჯებიან“, – განაცხადა ეკა გიგაურმა პრესკონფერენციაზე.

This post is also available in: English (ინგლისური)