სისხლისსამართლებრივი ბრალდებით აქციებზე დაკავებულთა რიცხვი 5-მდე გაიზარდა, ადმინისტრაციულით - 293-მდე

პოლიციამ სისხლისსამართლებრივი ბრალდებით თბილისში დააკავა საპროტესტო აქციების კიდევ ორი მონაწილე. შესაბამისად, ხუთამდე გაიზარდა რიცხვი იმ პირებისა, რომლებსაც ბრალად ედებათ პოლიციელებზე თავდასხმა, ან ნივთის დაზიანება.

შსს-ს მიერ დღეს, 3 დეკემბერს გამოქვეყნებული ინფორმაციით, დაკავებული არიან 1972 წელს დაბადებული დ.ლ. და 1987 წელს დაბადებული თ.ზ, რომლებმაც 1 დეკემბერს, რუსთაველის გამზირზე აქციის დროს სამართალდამცავების მიმართულებით ე.წ. მოლოტოვის კოქტეილები ისროლეს, რის შედეგადაც დაზიანდა შსს-ს წყლის ჭავლის ავტომობილი.

მანამდე ცნობილი იყო, რომ პოლიციელებზე თავდასხმის და ნივთის დაზიანებისთვის დაკავებულია სამი პირი, მათ შორის ერთი არასრულწლოვანი.

რაც შეეხება წვრილმანი ხულიგნობისა და პოლიციისთვის წინააღმდეგობის გაწევისა და დაუმორჩილებლობისთვის ადმინისტრაციული წესით დაკავებას, შსს-ს მიერ 3 დეკემებრს განახლებული მონაცემების მიხედვით, საპროტესტო აქციების დაწყებიდან დაკავებულია 293 პირი.

შსს-ს თანახმად, თბილისის საქალაქო სასამართლოსთვის უკვე წარდგენილი 108 პირის საქმიდან წარმოება დასრულდა 89-ის მიმართ, მათგან 43 დაჯარიმდა, 41-ს ადმინისტრაციული პატიმრობა შეეფარდა, ხოლო 5-ს შენიშვნა მიეცა.

შსს-ს მიერ 2 დეკემბერს გამოქვეყნებული მონაცემებით, ადმინისტრაციული სამართალდარღვევათა კოდექსის საფუძველზე დაკავებულთა საერთო რიცხვი 224 იყო.

თბილისში და საქართველოს ქალაქებში საპროტესტო გამოსვლები 28 ნოემბრიდან დაიწყო, მას შემდეგ, რაც „ქართული ოცნების" ხელისუფლებამ გადაწყვიტა, 2028 წლის ბოლომდე დღის წესრიგში არ დააყენოს ევროკავშირთან მის წევრობაზე მოლაპარაკების გახსნის საკითხი და 2028 წლის ბოლომდე უარი თქვას ევროკავშირის საბიუჯეტო გრანტებზე. ამასთან, „ქართული ოცნების" მთავრობა ირწმუნება, რომ მიზნად რჩება 2030 წლისთვის ევროკავშირში საქართველოს შესვლა.

მმართველმა პარტიამ ეს გადაწყვეტილება ოპოზიციის მიერ არალეგიტიმურად მიჩნეული, მე-11 მოწვევის პარლამენტის პირველი სხდომიდან რამდენიმე დღეში გამოაცხადა.

საპროტესტო აქციების მონაწილეები ხელისუფლებას ევროინტეგრაციის პროცესის შეჩერებაში ადანაშაულებენ და ხელახალ საპარლამენტო არჩევნებს მოითხოვენ.

შსს-ს სპეცრაზმელებმა რუსთაველის გამზირზე საპროტესტო აქციების მონაწილეთა დასაშლელად არაერთხელ გამოიყენეს წყლის ჭავლი და ცრემლმდენი გაზი. ბოლო დღეებში პოლიცია აკავებს და ფიზიკურად უსწორდება არა მხოლოდ აქციის იმ მონაწილეებს, რომლებიც სამართალდმცავებს პიროეტქნიკას, ქვებს, ჯოხებს და სხვა საგნებს ესვრიან, არამედ არაერთ მშვიდობიან დემონსტრანტსაც. ფიზიკურად იძალადეს მედიის წარმომადგენლებზეც.

ამ ფაქტების შესახებ შსს-ში დღეს, 3 დეკემბერს გამართულ პრესკონფერენციაზე დასმული შეკითხვების პასუხად, მინისტრის მოადგილემ ალექსანდრე დარახველიძე, განაცხადა, რომ მსგავს ფაქტებს სპეციალური საგამოძიებო სამსახური იძიებს.