სტრასბურგის სასამართლომ საქართველოს მიერ ბათუმის კარვის საქმეზე მომიტინგის უფლებების დარღვევა დაადგინა

ადამიანის უფლებათა ევროპულმა სასამართლომ დაადგინა, რომ საქართველომ დაარღვია ზურაბ ქარჩავას გამოხატვის თავისუფლება, რომელიც 2022 წელს ბათუმში საპროტესტო კარვის განთავსების მცდელობის გამო დააკავეს.

23 ივნისს „ქარჩავა საქართველოს წინააღმდეგ“ საქმეზე გამოტანილ გადაწყვეტილებაში, სასამართლომ ერთხმად დაადგინა, რომ საქართველომ დაარღვია ადამიანის უფლებათა ევროპული კონვენციის მე-10 მუხლი (გამოხატვის თავისუფლება), მე-11 მუხლთან (შეკრებისა და გაერთიანების თავისუფლება) ერთობლიობაში, და სახელმწიფოს 1 000 ევროს ოდენობის კომპენსაციის გადახდა დააკისრა.

საქმე ეხება ქარჩავას მიერ 2022 წლის ბოლოს დაგეგმილ სოლო საპროტესტო აქციას. აქტივისტი საჯარო სკოლებში მოსწავლეებისთვის უფასო კვების არარსებობას აპროტესტებდა. ქარჩავა მემედ აბაშიძის ქანდაკების უკან, საქართველოს საკონსტიტუციო სასამართლოსა და ადგილობრივი თვითმმართველობის შენობასთან ახლოს მდებარე საჯარო მოედანზე კარვის გაშლას და შიმშილობის დაწყებას აპირებდა.

პროტესტის დაწყების დღეს, პოლიციის თანამშრომლებმა მისი გადარწმუნება სცადეს, რადგან ეს ტერიტორია ახალი წლის აღსანიშნავად იყო განკუთვნილი. მათ ურჩიეს, სხვა ადგილას გადასულიყო. მოგვიანებით, ქარჩავა „პოლიციის კანონიერი ბრძანებების დაუმორჩილებლობისთვის“ დააკავეს, რაც ადმინისტრაციული სამართალდარღვევაა. იგი დამნაშავედ ცნეს და სიტყვიერი საყვედური გამოუცხადეს.

ქარჩავამ, რომლის ინტერესებსაც სტრასბურგის სასამართლოში საქართველოს ახალგაზრდა იურისტთა ასოციაცია იცავდა, განაცხადა, რომ მისი სოლო აქციის შეწყვეტა და შემდგომი ადმინისტრაციული გასამართლება მისი გამოხატვის თავისუფლებისა და მშვიდობიანი შეკრების უფლებების დარღვევას წარმოადგენდა ადამიანის უფლებათა ევროპული კონვენციის მე-10 და მე-11 მუხლებით.

This post is also available in: