ტრამპის ინაუგურაციაზე დასასწრებად „ქართული ოცნების“ მთავრობაში მიწვევა არავის მიუღია

მათივე ცნობით, მოწვევა არ მიუღია არც მიხეილ ყაველაშვილს. „ქართული ოცნების“ მეექვსე პრეზიდენტად არჩეული მიხეილ ყაველაშვილის ინაუგურაცია 29 დეკემბერს გაიმართა.

ინაუგურაციას დაესწრება საქართველოს მეხუთე პრეზიდენტი, სალომე ზურაბიშვილი. მას მოწვევა აშშ-ის წარმომადგენელთა პალატის წევრმა ჯო უილსონმა გაუგზავნა.

დონალდ ტრამპის ინაუგურაცია ვაშინგტონში 20 იანვარს გაიმართება. როგორც წესი, აშშ-ის ახალარჩეული პრეზიდენტი ინაუგურაციის დღეს დებს ფიცს.

პარალელურად ცნობილი ხდება, რომ დონალდ ტრამპი ტრადიციას არღვევს და თავის ინაუგურაციაზე რამდენიმე ქვეყნის ლიდერს იწვევს. მათ შორის არიან არგენტინის პრეზიდენტი ხავიერ მილეი, სალვადორის პრეზიდენტი ნაიბ ბუკელე და ჩინეთის პრეზიდენტი სი ძინპინი.

ინაუგურაციაზე დასასწრები ბილეთების გარკვეულ რაოდენობას იღებენ კონგრესმენებიც და ისინი თავად წყვეტენ, ვის დაპატიჟებენ.