civil ახალი ამბები 
საქართველოს იუსტიციის უმაღლესი საბჭო უზენაესი სასამართლოს მოსამართლის შერჩევის პროცესს თავიდან იწყებს. ეს გადაწყვეტილება მას შემდეგ იქნა მიღებული, რაც ერთადერთმა კანდიდატმა თემურ გოგოხიამ, 13 ოქტომბერს, კონკურსის ფინალურ ეტაპზე გადასვლიდან მეორე დღეს, საკუთარი კანდიდატურა მოხსნა.
იუსტიციის უმაღლესმა საბჭომ გოგოხია კონკურსის ფინალურ ეტაპზე 12 ოქტომბერს შეარჩია. მომდევნო დღეს გოგოხიამ საკუთარი კანდიდატურა მოხსნა, თუმცა ამის მიზეზი საჯაროდ არ განუმარტავს. უზენაესი სასამართლოს მოსამართლეობის კანდიდატებს იუსტიციის უმაღლესი საბჭო წარადგენს, ხოლო პარლამენტი მათ ამტკიცებს. მოსამართლეები თანამდებობაზე უვადოდ ინიშნებიან.
უზენაეს სასამართლოში არსებულ ერთ ვაკანტურ ადგილზე განაცხადები ელექტრონული ფორმით 2026 წლის 15 ოქტომბრიდან 5 ნოემბრის ჩათვლით მიიღება. აღნიშნული პოზიცია მას შემდეგ გახდა ვაკანტური, რაც 8 ივლისს უზენაესი სასამართლოს მოსამართლე გიორგი გოგიაშვილი გარდაიცვალა.
თემურ გოგოხიას საქართველოს სასამართლო სისტემაში სხვადასხვა მაღალი თანამდებობა ეკავა. 2017 წლის ივლისში იგი თბილისის საქალაქო სასამართლოს მოსამართლედ დაინიშნა, ხოლო იმავე წლის ოქტომბერში – ამავე სასამართლოს სისხლის სამართლის საქმეთა კოლეგიის თავმჯდომარის მოვალეობის შემსრულებლად. 2020 წლის მარტში იგი კოლეგიის თავმჯდომარედ დაინიშნა, 2021 წლის სექტემბერში კი – სასამართლოს სისხლის სამართლის საქმეთა პალატის თავმჯდომარედ. 2021-დან 2024 წლამდე იგი იუსტიციის უმაღლესი საბჭოს წევრი იყო.
უფრო ადრე, 2008-დან 2010 წლამდე, იგი მოსამართლისა და სასამართლოს თავმჯდომარის თანამდებობებს იკავებდა ფოთში; 2010-დან 2012 წლამდე – ბათუმში, ხოლო 2013-დან 2017 წლამდე – ქუთაისში.
მისი სახელი ადრეც ფიგურირებდა მედიასა და არასამთავრობო ორგანიზაციების ანგარიშებში, რომლებიც სასამართლო სისტემაში ნეპოტიზმის შესაძლო შემთხვევებსა და ხელისუფლებისადმი ლოიალურ დამოკიდებულებას ეხებოდა.
2023 წელს იგი იუსტიციის უმაღლესი საბჭოს იმ წევრებს შორის იყო, რომლებმაც საჯაროდ გააკრიტიკეს აშშ-ის მიერ ქართველი მოსამართლეების წინააღმდეგ დაწესებული სანქციები.
This post is also available in:
