უკრაინის დრონებმა შაბათს კვლავ მიიტანეს იერიში ომსკზე

უკრაინის უპილოტო საფრენმა აპარატებმა 24 ოქტომბერს, დღისით, კვლავ მიიტანეს იერიში ომსკზე. ომსკის ოლქის გუბერნატორმა ვალერი ხოცენკომ განაცხადა, რომ საჰაერო თავდაცვის ძალები თავდასხმას იგერიებენ.

ტელეგრამის არხი „ომსკოე გრაჟდანსკოე სოპროტივლენიე“ ქალაქში გაჩენილი ხანძრების ვიდეოებს აქვეყნებს. არხის ავტორები თავდაპირველად ვარაუდობდნენ, რომ ხანძარი გაჩნდა ომსკის ნავთობგადამამუშავებელ ქარხანაში, რომელიც ადრეც გამხდარა უკრაინული დრონების თავდასხმის ობიექტი, თუმცა მოგვიანებით მივიდნენ დასკვნამდე, რომ, სავარაუდოდ, იწვის ქარხანა „ომსკი კაუჩუკი“. ორივე საწარმო ქალაქის ჩრდილოეთით განლაგებულ სამრეწველო ზონაში მდებარეობს.

ომსკის ტელეგრამის არხები იუწყებიან აფეთქების მსგავსი ხმების შესახებ. უკრაინული სამონიტორინგო არხები ExileNova+ და Supernova+ წერენ დრონების მიერ „ომსკი კაუჩუკისა“ და მარკეტპლეის OZON-ის საწყობის დაზიანების შესახებ.

ომსკი უკრაინის საზღვრიდან 2500 კილომეტრზე მეტი მანძილითაა დაშორებული. ქალაქში მდებარეობს რუსეთში უმსხვილესი ნავთობგადამამუშავებელი ქარხანა - ომსკის ნავთობგადამამუშავებელი ქარხანა. უკრაინის უპილოტო საფრენმა აპარატებმა მასზე უკვე ორჯერ მიიტანეს იერიში: 2026 წლის 6 ივლისსა და 8 ოქტომბერს.