„ქართული ოცნება“ კანონმდებლობიდან „გენდერის“ ამოსაღებად ცვლილებებს აინიცირებს

„ქართული ოცნების“ დეპუტატებმა ფსევდოოპოზიციურ „ხალხის ძალასთან“ ერთად 24 თებერვალს პარლამენტში საკანონმდებლო პაკეტი წარადგინეს, რომელიც მიზნად ისახავს საქართველოს კანონმდებლობიდან ტერმინების „გენდერი“ და „გენდერული იდენტობის“ ამოღებას. დარეგისტრირებული კანონპროექტი ასევე ითვალისწინებს „გენდერული თანასწორობის შესახებ კანონის“ გადარქმევას „ქალისა და მამაკის თანასწორობის შესახებ კანონად“.

განმარტებით ბარათში ნათქვამია, რომ გენდერი არის „ხელოვნურად შექმნილი ტერმინი“ და მას შემდეგ, რაც დონალდ ტრამპი პრეზიდენტი გახდა, „სულ უფრო მეტად გააქტიურდა საუბარი აღნიშნული ხელოვნური პროცესის არაკეთილსინდისიერი მოტივებისა და მართულობის შესახებ’’.

განმარტებითი ბარათის თანახმად, ტერმინი „გენდერი“ ამოღებული იქნება საქართველოს კანონმდებლობიდან, ვინაიდან აუცილებელია „მის ნაცვლად საქართველოს კონსტიტუციით აღიარებული ქალისა და მამაკაცის თანასწორობის პრინციპის საკანონმდებლო დონეზე განმტკიცება“.

შემოთავაზებული ცვლილებები მიზნად ისახავს პარლამენტის გენდერული თანასწორობის საბჭოს ლიკვიდაციას. სახელმწიფო ბიუჯეტში გენდერთან დაკავშირებული სამუშაოებისთვის 50 ათასი ლარი იყო გამოყოფილი. საქართველოს პარლამენტი აღნიშნული მიმართულებით აქტივობებს განახორციელებს შესაბამისი კომიტეტებისა და სხვა საპარლამენტო სტრუქტურების მეშვეობით. კანონპროექტით ასევე გათვალისწინებულია გენდერული თანასწორობის საბჭოების გაუქმება ავტონომიურ რესპუბლიკებსა და მუნიციპალიტეტებში, რაც ადმინისტრაციული ხარჯების შემცირებას ისახავს მიზნად.

კანონპროექტის ავტორები და ინიციატორები არიან „ქართული ოცნების“ და „ხალხის ძალის“ დეპუტატები: არჩილ გორდულაძე, თორნიკე ჭეიშვილი, რატი იონათამიშვილი, დავით მათიკაშვილი, გურამ მაჭარაშვილი, ალექსანდრე ტაბატაძე, თენგიზ შარმანაშვილი, ალუდა ღუდუშაური, ვიქტორ ჯაფარიძე, სოზარ სუბარი, ნოდარ ტურძელაძე, ირმა ზავრადაშვილი, ლევან მაჭავარიანი, რამინა ბერაძე, ირაკლი კირცხალია, სალომე ჯინჯოლავა, თორნიკე ბერეკაშვილი, გენრიეტა წიწავა, მამუკა მდინარაძე.

იმავე დღეს, „ქართულმა ოცნებამ“ კიდევ ერთი საკანონმდებლო ინიციატივა წარადგინა – „უცხოური აგენტების რეგისტრაციის აქტი“. „ქართული ოცნების“ უმრავლესობის ლიდერმა მამუკა მდინარაძემ მანამდე განაცხადა, რომ კანონპროექტი აშშ-ის უცხოური აგენტების რეგისტრაციის აქტის (FARA) „ზუსტი ასლია“. პარლამენტის პრესრელიზის თანახმად, კანონპროექტი შეერთებულ შტატებში დღეს მოქმედი საკანონმდებლო აქტის ქართულენოვან თარგმანს წარმოადგენს.

ეს არ არის „ქართული ოცნების“ მიერ გენდერული პოლიტიკისკენ მიმართული პირველი საკანონმდებლო ნაბიჯი. 2024 წლის 17 სექტემბერს პარლამენტმა მიიღო ანტი ლგბტქ+ საკანონმდებლო პაკეტი, რომელიც შედგება ძირითადი კანონპროექტისაგან „ოჯახური ღირებულებებისა და არასრულწლოვანთა დაცვის შესახებ“ და 18 თანდართული ცვლილებისგან საქართველოს სხვადასხვა კანონში. კანონი, რომელიც ძალაში დეკემბერში შევიდა, მწვავედ გააკრიტიკა ვენეციის კომისიამ და სულ ახლახანს ლგბტი პირთა უფლებების დამცველმა ორგანიზაციამ ILGA-Europe.

ასევე წაიკითხეთ:

• 27/06/2024 – პარლამენტმა ანტი-ლგბტ კანონმდებლობა პირველი მოსმენით მიიღო
• 25/03/2024 – „ქართული ოცნება“ ანტი-ლგბტ საკონსტიტუციო ცვლილებებს აინიცირებს

This post is also available in: English (ინგლისური) Русский (რუსული)