ყაველაშვილი ჟენევაში ხელოვნური ინტელექტის შესახებ დიალოგზე სიტყვით გამოვიდა და გაეროს გენერალურ მდივანს შეხვდა

„ქართული ოცნების“ მიერ არჩეული პრეზიდენტი მიხეილ ყაველაშვილი 6 ივლისს ჟენევაში ხელოვნური ინტელექტის მმართველობის შესახებ გაეროს საინაუგურაციო გლობალურ დიალოგზე სიტყვით გამოვიდა და გაეროს გენერალურ მდივანს, ანტონიო გუტერეშს შეხვდა.

ღონისძიებაზე, რომელიც გაეროს გენერალური ასამბლეის მიერ ხელოვნური ინტელექტის მმართველობის შესახებ მოწვეული პირველი საერთაშორისო პლატფორმაა, ყველა წევრი სახელმწიფოს, ასევე კერძო სექტორის, სამოქალაქო საზოგადოების, აკადემიური წრეებისა და ტექნიკური საზოგადოების წარმომადგენლები შეიკრიბნენ, „საუკეთესო პრაქტიკის გაცვლისა და ხელოვნური ინტელექტის მმართველობისადმი საერთო მიდგომების შექმნის მიზნით“.

საინაუგურაციო სესიაზე გამოსვლისას, ყაველაშვილმა, ქართულ ენაზე სიტყვით გამოსვლისას, განაცხადა: „ხელოვნური ინტელექტის სწრაფ განვითარებას ფუნდამენტური გავლენა აქვს გაეროს მუშაობის სამივე საყრდენზე: მშვიდობა და უსაფრთხოება, ადამიანის უფლებები, და მდგრადი განვითარება“.

ხელოვნური ინტელექტის მიერ წარმოქმნილი რისკების შესახებ საუბრისას, მან განაცხადა, რომ მისმა არასწორმა გამოყენებამ შეიძლება რეალობის აღქმა იმდენად გაამრუდოს, რომ გლობალური არასტაბილურობა გამოიწვიოს. „ენა და კულტურა ჩვენი ცივილიზაციის საფუძველია. თუ ხელოვნური ინტელექტი მათზე კონტროლს დაგვაკარგინებს, საფრთხის ქვეშ დადგება ადამიანის რაობა და კაცობრიობის მომავალი“.

ყაველაშვილის თქმით, ხელოვნური ინტელექტის მოწინავე მოდელების შექმნას კოლოსალური ფინანსური რესურსები სჭირდება. „ძალაუფლების ეს უპრეცედენტო კონცენტრაცია არ უნდა იქცეს ტოტალიტარული კონტროლისა და ახალი ციფრული ტირანიის იარაღად, რომელიც ხელყოფს ეროვნულ სუვერენიტეტსა და ინდივიდუალურ თავისუფლებას“, – აღნიშნა ყაველაშვილმა.

მან საერთაშორისო თანამშრომლობისკენ მოუწოდა და განაცხადა, რომ „ჩვენი საერთო პასუხისმგებლობაა, შევქმნათ მყარი საერთაშორისო სამართლებრივი არქიტექტურა, რომელიც დააბალანსებს კონცენტრირებულ ძალაუფლებას, თავიდან აგვაცილებს გეოპოლიტიკურ ქაოსს და უზრუნველყოფს, რომ ეს უზარმაზარი რესურსი ცალკეული სუბიექტების დომინაციის ნაცვლად მთელი კაცობრიობის კეთილდღეობას, უსაფრთხოებასა და სტაბილურობას ემსახურებოდეს“.

სიტყვის გამოსვლის შემდეგ, იგი გაეროს გენერალურ მდივანს ანტონიო გუტერეშს შეხვდა.

„დავაფიქსირე საქართველოს მზადყოფნა, აქტიურად განაგრძოს გაეროს ფარგლებში თანამშრომლობა და წვლილი შეიტანოს იმ ინიციატივების განხორციელებაში, რომლებიც მშვიდობისა და მდგრადი განვითარების განმტკიცებას ისახავს მიზნად“, – წერს ყაველაშვილი „ფეისბუქზე“. „კიდევ ერთხელ გავუსვი ხაზი  საერთაშორისო  საზოგადოების მხარდაჭერის მნიშვნელობას,  ჩვენი ქვეყნის სუვერენიტეტისა და ტერიტორიული მთლიანობის დაცვის თვალსაზრისით“.

მან დასძინა, რომ ანტონიო გუტერეშს საქართველოში ოფიციალური ვიზიტისთვის მოწვევა კიდევ ერთხელ დაუდასტურა.

This post is also available in: