radiotavisupleba ახალი ამბები 
ყაზახეთის არმიის სულ მცირე ცხრა სამხედრო მოსამსახურე დაიღუპა 24 სექტემბერს კასპიის ზღვაში მიმდინარე სამხედრო-საზღვაო სწავლებების დროს. შტორმმა ზღვაში ჩაითრია 19 სამხედრო. მათგან სამის გადარჩენა მოხერხდა. დადასტურებულია ცხრა ადამიანის სიკვდილი. დანარჩენებს ეძებენ: სამძებრო-სამაშველო ოპერაციაში მონაწილეობენ სამხედრო-საზღვაო ძალების, საგანგებო სიტუაციების სამინისტროს, ავიაციისა და სხვა სამსახურების ქვედანაყოფები.
გამოცემა Lada.kz, რეპორტიორზე დაყრდნობით იუწყება შემთხვევის ადგილიდან, რომ წყლიდან ამოიტანეს კიდევ ორი სამხედრო მოსამსახურის გვამი. ტელეარხმა „ატამეკენმა“ გავრცელა ინფორმაცია, რომ დაღუპულთა რიცხვმა 12 ადამიანს მიაღწია, თუმცა ინფორმაციის წყარო არ მიუთითებია. ყაზახეთის თავდაცვის სამინისტროს ჯერჯერობით ოფიციალურად არ დაუდასტურებია ეს ინფორმაცია.
ყაზახეთის გენერალურმა პროკურატურამ სისხლის სამართლის საქმე აღძრა სამხედრო მოსამსახურეების დაღუპვის ფაქტზე, ასევე შეიქმნა სამთავრობო კომისია. ყაზახეთის პრეზიდენტმა ყასიმ-ჟომარტ ტოყაევმა მიუსამძიმრა დაღუპულთა ოჯახებს.
