radiotavisupleba ახალი ამბები 
მოსკოვის საპატრიარქოს დელეგაციის ვიზიტის მომდევნო დღეს, 2026 წლის 1 ოქტომბერს, საქართველოს მართლმადიდებელი ეკლესიის საპატრიარქოს თბილისში მსოფლიო საპატრიარქოს დელეგაცია ეწვია.
დელეგაციას, - რომელსაც ავსტრიის მიტროპოლიტი არსენი ხელმძღვანელობდა, - უმასპინძლა საქართველოს მართლმადიდებელი ეკლესიის კათოლიკოს-პატრიარქმა შიო მესამემ.
„მიტროპოლიტ არსენთან ერთად საქართველოში იმყოფება 50-მდე მომლოცველი, რომლებიც სრულიად საქართველოს კათოლიკოს-პატრიარქის ლოცვა-კურთხევით ჩვენი ქვეყნის სიწმინდეებს მოილოცავენ“, - წერს საპატრიარქოს პრესცენტრი.
ვინ იყო დელეგაციაში
საპატრიარქოს საზოგადოებასთან ურთიერთობის სამსახურის ცნობით, სტუმრებს შორის იყვნენ:
- მსოფლიო საპატრიარქოს წარმომადგენელი, ავსტრიის მიტროპოლიტი და უნგრეთისა და ცენტრალური ევროპის ეგზარქოსი არსენი (კარდამაკისი);
- ქორეპისკოპოსი მაქსიმე.
ვინ ესწრებოდა შეხვედრას
შიო მესამემ მათ უმასპინძლა ეკლესიის სხვა წარმომადგენლებთან ერთად:
- პატრიარქის ქორეპისკოპოსი, ახალციხისა და ტაო-კლარჯეთის მიტროპოლიტი თეოდორე ჭუაძე;
- ზუგდიდისა და ცაიშის ეპარქიის მიტროპოლიტი, საქართველოს საპატრიარქოს საგარეო საქმეთა განყოფილების ხელმძღვანელი, მიტროპოლიტი გერასიმე შარაშენიძე;
- პროტოპრესვიტერი გიორგი ზვიადაძე;
- დეკანოზი ანდრია ჯაღმაიძე, საპატრიარქოს საზოგადოებასთან ურთიერთობის სამსახურის ხელმძღვანელი.
- საპატრიარქოს საგარეო საქმეთა სამსახურის ხელმძღვანელის მოადგილე, დეკანოზი არჩილ ხაჩიძე.
რაზე ისაუბრეს
საპატრიარქოს პრესცენტრის ცნობით, მხარეებმა ისაუბრეს სხვადასხვა საკითხზე, მათ შორის:
- „ეკლესიებს შორის ურთიერთობებზე“;
- „იმ დახმარებაზე, რომელსაც მიტროპოლიტი არსენი უწევს ავსტრიაში ქართულ სამრევლოს“ - ამისთვის მას საქართველოს ეკლესიის მეთაურმა და შეხვედრის მონაწილეებმა მადლობა გადაუხადეს.
„შეხვედრაზე ასევე გაიხსენეს სრულიად საქართველოს კათოლიკოს-პატრიარქ ილია II-ის მოღვაწეობა“ და „შეხვედრის დასასრულს მხარეებმა ერთმანეთს საჩუქრები გადასცეს“.
გავრცელებულ ინფორმაციაში არაფერია ნათქვამი შიო მესამის დაგეგმილ ვიზიტზე სტამბულში, მსოფლიო საპატრიარქოში:
- საპატრიარქოში რადიო თავისუფლებას 2026 წლის 17 აგვისტოს განუცხადეს, რომ შიო მესამის პირველი საგარეო ვიზიტი კონსტანტინოპოლში შედგება, - თუმცა თარიღი ჯერ არ იყო დაზუსტებული;
- 2026 28 სექტემბერს კი განუცხადეს, რომ „არ მომხდარა შეთანხმებული თარიღის გაუქმება“.
წინა დღეს საპატრიარქოს მოსკოველი სტუმრები ეწვივნენ
წინა დღეს, 30 სექტემბერს კათოლიკოს-პატრიარქმა შიო III-მ მოსკოვის საპატრიარქოს წარმომადგენლებს უმასპინძლა - მოსკოვის საპატრიარქო და მსოფლიო საპატრიარქო დაპირისპირებული მხარეები არიან.
მხარეებმა „ქვეყნებს შორის ურთიერთობებზე ისაუბრეს“, მათ შორის ოკუპირებულ ტერიტორიებზე არსებულ ვითარებაზე.
„ერთსულოვნების“ თანახმად, მათ ისაუბრეს:
- „მტკივნეულ რეგიონებში არსებულ ვითარებაზე;
- ასევე იმაზე, რა შეიძლება გაკეთდეს, რათა გამოინახოს გზები, რომ საქართველოს მართლმადიდებელ ეკლესიას შესაძლებლობა ჰქონდეს, ადგილობრივ მრევლთან ურთიერთობა დაამყაროს“.
