civil ახალი ამბები 
ხელისუფლების წარმომადგენლებმა განაცხადეს, რომ ახალი ინვესტიციების მეშვეობით 2036 წლისთვის ელექტროენერგიის გენერაცია 2,5-ჯერ გაზრდას ვარაუდობენ. მათ 10-წლიანი ხედვა წარმოადგინეს, რომელიც ორიენტირებულია იმაზე, რომ ელექტროენერგეტიკული სექტორი „სრულად თვითკმარი“ გახდეს, გაიზარდოს განახლებადი ენერგიის წყაროებიდან გამომუშავება, გაძლიერდეს ქვეყნის როლი ენერგეტიკულ ტრანზიტში და ელექტროენერგიის გადამცემი ქსელის მოდერნიზაცია განხორციელდეს.
„ქართული ოცნების“ წარმომადგენლებმა, მათ შორის პრემიერ-მინისტრმა ირაკლი კობახიძემ და ეკონომიკის მინისტრმა მარიამ ქვრივიშვილმა, ეს გეგმები 17 სექტემბერს, ენერგეტიკოსის დღის აღსანიშნავ ღონისძიებაზე წარადგინეს. მათ ხაზი გაუსვეს მიზანს, რომ საქართველო 2036 წლისთვის ელექტროენერგიის კუთხით „სრულად თვითკმარი“ გახდეს, ხოლო კასპიის რეგიონი, შავი ზღვა და ევროპა „ერთიან ენერგეტიკულ სივრცეში“ გაერთიანდეს.
ქვრივიშვილის თქმით, აღნიშნული ხედვა ასევე ითვალისწინებს შავი ზღვის წყალქვეშა კაბელის პროექტის განვითარებას, რომელსაც წელს ევროკავშირმა „საერთო ინტერესის პროექტის“ სტატუსი მიანიჭა, და უფრო ფართომასშტაბიან „მწვანე დერეფნის“ პროექტს, რომელიც საქართველოს აზერბაიჯანთან, თურქეთთან, ბულგარეთსა და რუმინეთთან დააკავშირებს.
This post is also available in:
