netgazeti 
ირაკლი კობახიძემ ყოფილი კულტურის მინისტრის, თიკა რუხაძის ირგვლივ ატეხილ აჟიოტაჟსა და პატრიარქის დაკრძალვისთვის გამოყოფილი მილიონების შესაძლო არამიზნობრივ ხარჯვაზე გავრცელებულ ინფორმაციაზე გააკეთა კომენტარი. მისი განცხადებით, მთავრობის ადმინისტრაციის პირველადი ინფორმაციით, საქმეში რაიმე სახის ფინანსური დარღვევა არ იკვეთება.
ბოლო დღეებში სოციალურ ქსელში ყოფილი მინისტრის მისამართით კითხვები გააქტიურდა. კერძოდ, დათო ოქიტაშვილმა საჯაროდ დასვა შეკითხვა: „სად წავიდა მილიონები?“, რაც სწორედ პატრიარქის დაკრძალვის ორგანიზებისთვის გაწეულ ხარჯებს უკავშირდებოდა. საკითხმა იმხელა რეზონანსი შეიძინა, რომ საპარლამენტო უმრავლესობის წევრთა ნაწილმა საქმით პროკურატურის დაინტერესების შესაძლებლობაც კი არ გამორიცხა.
ირაკლი კობახიძემ ბრიფინგზე აღნიშნა, რომ ბრალდებების მიუხედავად, საბიუჯეტო თანხები კანონის სრული დაცვით დაიხარჯა.
„ამასთან დაკავშირებით რამდენჯერმე გავრცელდა ინფორმაცია, რომ არამიზნობრივი ხარჯი იყო გაწეული. მთავრობის ადმინისტრაციიდან უკვე მაქვს პირველადი ინფორმაცია, რომლის თანახმადაც არავითარი არამიზნობრივი ხარჯი არ იკვეთება. უფრო მეტიც, ბევრად მეტი თანხა იყო გამოყოფილი და ამ თანხის ძალიან დიდი ნაწილი უკან დაბრუნდა“, — განაცხადა კობახიძემ.
ჟურნალისტების კითხვაზე, უნდა დაიწყოს თუ არა აღნიშნულ საქმეზე ოფიციალური გამოძიება, კობახიძემ განმარტა, რომ საზოგადოების მაღალი ინტერესიდან გამომდინარე, მთავრობა თავს ვალდებულად მიიჩნევს, ფინანსური ხარჯების შესახებ დეტალური ანგარიში გაასაჯაროოს.
„გამომდინარე იქიდან, რომ იყო არაერთი განცხადება გავრცელებული, უახლოეს მომავალში სრულ, დეტალურ ინფორმაციას გავუზიარებთ საზოგადოებას იმის შესახებ, თუ რა ხარჯები იქნა გაწეული. თუ ამის შემდეგ კიდევ რაიმე კითხვა დარჩება ამ საკითხთან დაკავშირებით, ვიმსჯელოთ ერთად და შეგვიძლია ნებისმიერ საგამოძიებო უწყებას მივმართოთ“, — დასძინა ირაკლი კობახიძემ.
შეგახსენებთ, რომ თიკა რუხაძე “ოცნების” მთავრობაში კულტურის მინისტრის პოსტს სწორედ ირაკლი კობახიძის ხელმძღვანელობის პერიოდში იკავებდა. საგამოძიებო უწყებებს აღნიშნულ საქმეზე ოფიციალური კომენტარი ჯერჯერობით არ გაუკეთებიათ.
