დედაშვილობის გულის ამაჩუყებელი ამბავი – ძაღლმა მომაკვდავი ლეკვი ვეტერინართან მიიყვანა (ვიდეო)

სტამბოლში ვეტერინარებმა გადაარჩინეს ლეკვი, რომელიც მათ კლინიკაში მაწანწალა ძაღლმა მიიყვანა. ამის შესახებ  გამოცემა Haberler-ი წერს.

ვეტერინარული კლინიკის სათვალთვალო კამერით გადაღებულ კადრებში ჩანს წვიმისგან გალუმპული ქუჩის ძაღლი, რომელსაც კბილებით უჭირავს თავისი მომაკვდავი ლეკვი და კლინიკის კარამდე მიჰყავს.

საბედნიეროდ, ვეტერინარმა ლეკვი დროულად შეამჩნია და კლინიკაში შეიყვანა. მდგომარეობა მძიმე იყო, გულისცემა თითქმის არ იგრძნობოდა და ლეკვს სარეანიმაციო პროცედურები დასჭირდა.

დედა ძაღლი იქვე იჯდა და ფხიზლად ადევნებდა თვალს ვეტერინარის სამედიცინო მანიპულაციებს.

ვეტერინარის თქმით, ძაღლმა კლინიკასთან ახლოს დაყარა ლეკვები, მაგრამ უმეტესობა მალევე დაიხოცა, გადარჩა მხოლოდ ორი. მოხალისე ცხოველთა დამცველებმა წინა დღეს მასთან ერთი გადარჩენილი ლეკვი მიიყვანეს და არ იცოდნენ, კიდევ ერთი ლეკვი თუ იყო ცოცხალი. მეორე ლეკვს თავად დედამ უშველა.

„დედა ძაღლს საკმარისი რძე არ ჰქონდა, ამიტომ ლეკვებს დამატებით საკვებს ვაწვდით. მათი მდგომარეობა უმჯობესდება და იმედი გვაქვს, მკურნალობის დასრულებამდე მოიძებნება ვინმე, ვინც დედას შვილებიანად სახლში წაიყვანს. ძალიან ჭკვიანი ძაღლია“, – ამბობს ვეტერინარი.

MOTHER’S INSTINCT: Security camera footage caught the heartwarming moment a mother dog carried her unconscious, hypothermic puppy to a veterinary clinic to get help in Istanbul, Turkey. pic.twitter.com/Ck109EY3MQ

— CBS Detroit (@CBSDetroit) January 17, 2025

მანანა ბანძელაძე