“დღეს აქციაზე დგანან ის ადამიანებიც, რომლებმაც 26 ოქტომბერს მათ მისცეს ხმა“

არასამთავრობო ორგანიზაცია “განვითარების ცენტრის“ დამფუძნებელმა, საპროტესტო აქციებში აქტიურად ჩართულმა ნინო ორდენიძემ “ტვ პირველის“ ეთერში, ქვეყანაში მიმდინარე მოვლენებზე ისაუბრა.

ნინო ორდენიძის თქმით, დღეს, ქვეყანაში მიმდინარე საპროტესტო აქციებზე უკვე ის ადამიანებიც დგანან, რომლებმაც 26 ოქტომბერს “ქართულ ოცნებას“ მისცეს ხმა:

“დღეს აქციაზე ის ადამიანებიც დგანან, რომლებმაც 26 ოქტომბერს მათ მისცეს ხმა, ძალიან ბევრი, იმიტომ, რომ ყველა გამოიყვანეს.

მე ძალიან იმედიანად ვარ და ამ პროცესს ოპტიმისტურად ვუყურებ, ახლა დიდებული პროცესი მიდის.

ჩვენი ერი გამოდის მაშინ, როცა ფიქრობენ, რომ ყველაფერს კარგავენ. დგანან ყველა ასაკის და პროფესიების ადამიანები. ახლა დგანან კულტურის წარმომადგენლები, ექიმები, ხელოვანები, ბავშვები, რომლებიც დამოუკიდებელ საქართველოში არიან დაბადებულები. მე 1980 წელს დავიბადე, 90-იანებში ვიყავი თინეიჯერი და ეს იყო საშინელება. ყველაფერს გავაკეთებ, რომ ჩემმა ორმა შვილმა ის არ გადაიტანოს, რაც მე 90-იან წლებში გადავიტანე და ვნახე“, – თქვა ნინო ორდენიძემ გადაცემაში “რეაქცია“.