ევროკავშირის ახალი ხელმძღვანელები კიევში ჩავიდნენ

დღეს, 1 დეკემბერს კიევში ჩავიდნენ ევროპული საბჭოს პრეზიდენტი ანტონიუ კოშტა და ევროკავშირის უმაღლესი წარმომადგენელი საგარეო და უსაფრთხოების პოლიტიკის საკითხებში, კაია კალასი.

ევროკავშირის ხელმძღვანელ თანამდებობებზე ნოემბერში არჩეული კოშტა და კალასი უფლებამოსილების შესრულებას ოფიციალურად დღეიდან შეუდგნენ, ამიტომ, პირველივე დღეს უკრაინაში მათ ჩასვლას სიმბოლური დატვირთვაც აქვს.

კიევში ჩასულმა კაია კალასმა სოციალურ ქსელ X-ში, ოფიციალურ გვერდზე დაწერა, რომ ევროკავშირს ომში უკრაინის გამარჯვება სურს და ამისთვის ყველა შესაძლებლობას გამოიყენებს.

ევროპული საბჭოს პრეზიდენტ ანტონიუ კოშტას განცხადებით, კიევში ჩავიდნენ მკაფიო სიგნალით, რომ ევროკავშირი განაგრძობს უკრაინის სრულ მხარდაჭერას.

ევროკავშირის ახალი ხელმძღვანელები შეხვდებიან უკრაინის პრეზიდენტ ვოლოდიმირ ზელენსკის და მთავრობის, პარლამენტის და სამოქალაქო საზოგადოების წარმომადგენლებს.