"ვამაყობ სიმტკიცითა და ურყევი ნებით, რასაც ქართველი ერი ავლენს" - ამირან გოგოლაძე მოვლენებზე

MMA-ის ქართველი მებრძოლი ამირან გოგოლაძე საქართველოში მიმდინარე მოვლენებს სოციალური ქსელის საშუალებით ეხმაურება.

"მინდა ჩემი მხარდაჭერა გამოვხატო ყველა იმ გაბედული ქართველის მიმართ, ვინც ერთად დგას საერთო თავისუფლებისთვის,
ღირებულებებისთვის

ერთიანობისთვის და ჩვენი შვილების უკეთესი მომავლისთვის.

ვამაყობ იმ სიმტკიცითა და ურყევი ნებით, რასაც ქართველი ხალხი მშვიდობიანი პროტესტით ავლენს. ჩვენი გზა ევროპული ინტეგრაციისკენ არის შესაძლებლობებისა და პროგრესის გზა.

მჯერა, რომ სიყვარული, სიმტკიცე და ერთიანობა ყოველთვის იმარჯვებს. ყოველი ნაბიჯით, ჩვენ მსოფლიოს ვაჩვენებთ, რომ თავისუფლება და სამართლიანობა არა მხოლოდ სიტყვებია, არამედ ქართველი ხალხის უდიდესი ღირებულება.

სიმტკიცე და ნამდვილი სიძლიერე სწორედ ერთმანეთის მხარდაჭერაში გამოიხატება და არა დაუცველების წინააღმდეგ ძალის გამოყენებაში.
ამ ღირებულებებისთვის ბრძოლაში სნაიპერი თქვენს გვერდით დგას – ერთად უფრო ძლიერები ვართ!"

- წერს გოგოლაძე.