ისრაელის ავიაციამ პირველად მიიტანა იერიში იემენის დედაქალაქ სანაზე

ისრაელის ავიაციამ და საზღვაო ძალებმა პირველად განახორციელეს დარტყმები იემენის დედაქალაქ სანაზე და ასევე თავს დაესხნენ პორტებს, რომლებსაც ჰუთები აკონტროლებენ. ამის შესახებ Ynet-ი იუწყება.

ისრაელის თავდაცვის არმიის ოფიციალური განცხადების თანახმად, სანაზე თავდასხმის მიზანი იყო ენერგეტიკული ინფრასტრუქტურის განადგურება, რომელსაც ჰუთები იყენებენ სამხედრო ოპერაციების ჩასატარებლად, მათ შორის ისრაელზე თავდასხმებისთვის.

შედეგად, ჰუთების მიერ კონტროლირებადი ტერიტორიის უმეტეს ნაწილს ელექტროენერგია შეეზღუდა. გარდა ამისა, თავს დაესხნენ რას-ისის, ჰოდეიდისა და ალ-სალიფის პორტებს, დაზიანდა მათ მახლობლად მდებარე საზღვაო ბუქსირები.

დარტყმა პასუხი იყო იემენის სარაკეტო თავდასხმაზე, რომელიც იემენმა მანამდე განახორციელა ისრაელზე წუხელ ღამით. ისრაელის 20-ზე მეტ დასახლებაში საჰაერო განგაში გამოცხადდა. ჰუთების მიერ გაშვებული რაკეტა ისრაელის საჰაერო სივრცის გარეთ დაიჭირეს, მაგრამ საჰაერო თავდაცვის რაკეტის ფრაგმენტები ისრაელის ტერიტორიაზე ჩამოვარდა. განადგურდა რამათ-განის დაწყებითი სკოლა, მეზობელი შენობები და ავტომანქანები. მსხვერპლი არ ყოფილა.

ისრაელის მედიის ცნობით, ეს არის იემენის მერვე თავდასხმა ისრაელზე ბოლო ერთი თვის განმავლობაში და მეორე - უკანასკნელ სამ დღეში. ისრაელმა იემენს ბოლოს 29 სექტემბერს შეუტია. მაშინ დაარტყეს რას-ისისა და ჰოდეიდის პორტებს.

ჰუთები იემენის ტერიტორიის დიდ ნაწილს აკონტროლებენ. შარშან ოქტომბერში მათ განაცხადეს, რომ უერთდებიან პალესტინის რადიკალური დაჯგუფება ჰამასის ომს ისრაელის წინააღმდეგ (ჰამასი აშშ-სა და ევროკავშირში ტერორისტულ ორგანიზაციად არის აღიარებული). ჰუთების თავდასხმებმა შეაფერხა საერთაშორისო ვაჭრობა ევროპასა და აზიას შორის საკვანძო მარშრუტზე (გლობალური ვაჭრობის 15% გადის წითელ ზღვაზე). ზოგიერთმა გადამზიდავმა კომპანიამ შეაჩერა თავისი საქმიანობა რეგიონში, ისინი გემებს აგზავნიან აფრიკის გარშემო, უფრო გრძელი და ძვირი მარშრუტით.